نئی دہلی؍ کولمبو، 24؍اپریل (ایس او نیوز؍ایجنسی) اس وقت سری لنکا زبردست معاشی بحران کا سامنا کر رہا ہے۔ مہنگائی عروج پر ہے اور ضروری سامانوں کی قیمتیں آسمان چھو رہی ہیں۔ ایسے میں ہندوستان اور چین سمیت کئی پڑوسی ممالک نے سری لنکا کی مدد کے لیے ہاتھ بڑھایا ہے۔ بین الاقوامی مانیٹری فنڈ کی طرف سے بھی راحتی پیکیج دینے کا اعلان کیا گیا ہے۔

اس درمیان سری لنکا کے وزیر مالیات علی صابری نے ہفتہ کے روز کہا کہ ’’ہندوستان اور عالمی بینک مل کر سری لنکا کو 15.29 ہزار کروڑ روپے کی مدد دینے پر غور کر رہے ہیں۔‘‘ میڈیا رپورٹس کے مطابق معاشی بحران سے باہر نکلنے کے لیے سری لنکا کئی ممالک کا رخ کر رہا ہے۔ اس عمل میں سری لنکا نے چین اور جاپان سے بھی بات کی ہے۔ علی صابری کا کہنا ہے کہ عالمی بینک آئندہ چار مہینوں میں 30 کروڑ سے 60 کروڑ ڈالر کی توسیع کرنے کا منصوبہ بنا رہا ہے، جس سے ملک میں دوا اور ضروری سامان کو محفوظ کیا جا سکے۔

معاشی بحران سے نبرد آزما سری لنکا کو ہندوستان نے 50 کروڑ ڈالر کا اضافی قرض دینے پر اتفاق ظاہر کیا ہے۔ سری لنکا کو بین الاقوامی مانیٹری فنڈ سے باز آبادکاری پیکیج ملنے میں تاخیر کے درمیان ہندوستان مزید مدد کو آگے آیا ہے۔ سری لنکا کے وزیر مالیات علی صابری نے یہ جانکاری دی۔ سری لنکا کے پاس تیل درآمد کرنے کا بھی پیسہ نہیں ہے۔ اس کا غیر ملکی کرنسی کا ذخیرہ ختم ہو چکا ہے۔ ملک میں مہنگائی بھی بے قابو ہے۔

واضح ہو کہ صابری نے جمعہ کو ایک بیان میں کہا تھا کہ ہندوستان تیل درآمد کے لیے ہمیں 50 کروڑ ڈالر اضافی دینے پر راضی ہو گیا ہے اور امید ہے کہ وہ ایک ارب ڈالر کے اضافی قرض پر بھی غور کرے گا۔ سری لنکا کو ہندوستان 1.5 ارب ڈالر کی درآمدگی بل ادائیگی ملتوی کرنے پر پہلے ہی اتفاق ظاہر کر چکا ہے۔ سری لنکا کو یہ رقم ایشین کلیئرنگ یونین کو ادا کرنی ہے۔