اڈانی ڈیل پر تنازع کے بعد سری لنکا پاور بورڈ کے سربراہ نے استعفیٰ دیا
کولمبو؍نئی دہلی، 14؍ جون (ایس او نیوز؍ایجنسی) سری لنکا میں ایک سرکاری کمپنی سیلون الیکٹرسٹی بورڈ (سی ای بی) کے چیئرمین ایم ایم سی فرڈیننڈو نے ہندوستان کے اڈانی گروپ کے ساتھ ایک متنازعہ ونڈ پاور ڈیل پر تنازعہ پیدا ہونے کے بعد استعفیٰ دے دیا ہے۔
مسٹر فرڈیننڈو نے پیر کو اڈانی گروپ کے ساتھ قابل تجدید توانائی کے معاہدے کے بارے میں دیئے گئے ایک متنازعہ بیان پر استعفیٰ دے دیا۔
وزیر توانائی کنچنا وجیسیکرا نے پیر کو ٹویٹ کیا کہ’ میں نے سی ای بی چیئرمین مسٹر ایم ایم سی فرنینڈو کے ذریعہ مجھے دیے گئے استعفیٰ کا خط قبول کر لیا ہے اور نائب صدر نلنڈا الانگاکون نئےچیئرمین سی ای بی کے طورپر کام کاج سنبھالیں گے۔‘
مسٹر فرڈیننڈو نے سری لنکا کی پارلیمنٹ کی پبلک انٹرپرائزز (سی او پی ای ) کی کمیٹی کو بتایا کہ صدر گوٹابایا راجا پکسے نے انہیں بتایا ہے کہ وزیر اعظم نریندر مودی نے ان پر ونڈ پاور پروجیکٹ ہندوستان کے اڈانی گروپ کو سونپنے کا دباؤڈالا تھا ۔اس بیان کو ہندوستان اور سری لنکا کے اخبارات نے بہت نمایاں طور پر شائع کیا تھا۔
