منگلورو،14؍جون (ایس او نیوز)ضلع جنوبی کینرا جو ابھی کورونا وباء کی مار جھیل رہا ہے، اس کے لئے اب ڈینگی بخار اس سے بھی بڑا خطرہ بن کر سامنے کھڑا ہوگیا ہے۔

چونکہ لاک ڈاؤن کے دوران جبکہ شدید گرمی کا عالم تھا اس وقت 40سے زیادہ ڈینگی بخار کے معاملات سامنے آئے تھے۔ اب جب برسات کا موسم شروع ہوا ہے توپھر فطری طور پر اس میں تیزی آسکتی ہے اسی لئے ڈاکٹروں کا خیال ہے کہ ڈینگی بخار کورونا سے زیادہ ہلاکت ثابت ہوسکتا ہے۔گزشتہ سال بھی ضلع میں ڈینگی کے بہت ہی زیادہ معاملے سامنے آئے تھے۔اس میں ڈینگی کی تشخیص کے بعد علاج کارگر نہ ہونے سے 5لوگوں کی موت واقع ہوگئی تھی۔اس کے علاوہ بیس سے زائد مریض جو موت کا شکار ہوگئے تھے ان میں بھی ڈینگی ہونے کا شبہ تھا۔

معلوم ہوا ہے کہ امسال جنوری سے اب تک 80سے زائد ڈینگی اور 368ملیریا بخارکے مریض دیکھنے کو ملے ہیں۔ عموماً جون کے مہینے سے ستمبر تک ڈینگی اور ملیریا کی وباء پھیل جاتی ہے۔ اب تک منگلورو کے مضافاتی علاقوں اور مختلف تعلقہ جات میں اس عرصے میں مرض پھیلنے کے آثار دکھائی دے رہے ہیں۔ وبائی امراض پر کنڑول کے نامزد ڈاکٹر نوین چندرا کولال نے بتایا کہ وبائی امراض سے بچنے کے لئے عوام کو خود ہی احتیاطی تدابیراختیار کرنا چاہیے اور اپنے گھر اور اطراف کے ماحول کو پاک وصاف رکھنے کے ساتھ کہیں بھی برساتی پانی کو جمع ہونے نہیں دینا چاہیے۔