بدعنوانی کے معاملے میں یڈی یورپا کے خلاف جانچ کا فیصلہ، خصوصی عدالت نے لوک آیکت پولیس کو جاری کیا حکم
بنگلورو، 15؍ستمبر (ایس او نیوز؍ایجنسی) کرناٹک میں اراکین پارلیمنٹ اور اراکین اسمبلی کے خلاف معاملوں کے لیے تشکیل خصوصی عدالت نے بدھ کے روز بی جے پی لیڈر بی ایس یدی یورپا کو جھٹکا دیتے ہوئے لوک آیکت پولیس کو ان کے خلاف بدعنوانی کا معاملہ درج کرنے اور وزیر اعلیٰ رہتے ہوئے اقتدار کے غلط استعمال کے الزامات کی جانچ کرنے کا حکم دیا۔
سماجی کارکن ٹی جے ابراہم نے الزام عائد کیا ہے کہ یدی یورپا نے مبینہ طور پر شیل کمپنیوں کے ذریعہ سے زبردست مالی فائدہ کے بدلے رام لنگم کنسٹرکشن کو ایک بی ڈی اے رہائشی پروجیکٹ پیش کیا تھا۔ اسی معاملے میں آج عدالت کا یہ فیصلہ آیا ہے۔ ابراہم نے پہلے یدی یورپا، ان کے بیٹے بی وائی وجیندر، کوآپریٹو وزیر ایس ٹی سوم شیکھر اور چھ دیگر کے خلاف جانچ کا مطالبہ کرتے ہوئے ذیلی عدالت کا دروازہ کھٹکھٹایا تھا۔ حالانکہ خصوصی عدالت نے گورنر سے پیشگی اجازت نہ ہونے پر عرضی خارج کر دی تھی۔
اس کے بعد ٹی جے ابراہم نے ہائی کورٹ میں عرضی داخل کی تھی جس نے خصوصی عدالت کو اس معاملے پر پھر سے غور کرنے کی ہدایت دی تھی۔ اس فیصلے کے بعد یدی یورپا نے کہا کہ الزامات میں کوئی سچائی نہیں ہے، ارو وہ عدلیہ میں مکمل یقین رکھتے ہیں، اور جانچ میں بے قصور ثابت ہوں گے۔ انھوں نے کہا کہ یہ میرے خلاف سازش ہے۔