منگلورو،5 / فروری (ایس او نیوز) جنوبی کینرا کے ضلع ایس پی کی حیثیت سے چارج لینے والے وکرم اماتھے نے علاقے میں امن و امان کی بحالی کے پیش نظر آئندہ منافرت بھری تقاریر کرنے والوں کے خلاف کڑی کارروائی کرنے اور لازمی طور پر ایف آئی آر درج کرنے کی وارننگ دی ہے۔ 
    
اپنے دفتر میں نامہ نگاروں کے ساتھ غیر رسمی بات چیت کے دوران اماتھے نے کہا کہ آئندہ الیکشن کے مد نظر علاقے میں امن و امان بنائے رکھنا ان کی سب سے بڑی ترجیح ہوگی ۔  الیکشن کا موسم قریب آتے ہی نفرت بھری تقاریر کا سلسلہ زور پکڑنے کے سلسلے میں جب ان سے پوچھا گیا تو انہوں نے کہا کہ اسے ہرگز برداشت نہیں کیا جائے گا اور ایسے قصورواروں  کے خلاف ضرور ایف آئی آر درج کیے جائیں گے۔ 
    
انہوں نے کہا کہ شرپسندوں، افواہیں پھیلانے والوں ، راوڈی شیٹرس اور مجرموں جیسے سماج میں موجود برے عناصر پر کڑی نگاہ رکھی جائے گی ۔  نفرت پھیلانے والوں اور گمراہ کن پوسٹس پر نظر رکھنے کے لئے سوشیل میڈیا مانٹرنگ سیل (SMMC) کو مضبوط بنایا جائے گا اور خطا کاروں کے خلاف سخت اقدامات کیے جائیں گے ۔ اب سب ڈیویژن لیول پر بھی سوشیل میڈیا مانٹرنگ سیل قائم کیے جائیں گے۔