منگلورو،3؍جون(ایس  او نیوز) کرناٹک کے جنوبی کنڑا ضلع میں افسروں نے کئی بار تنبیہ کے باوجود حجاب پہننے پر جمعرات کو ایک کالج کی6 طالبات کو معطل کر دیا اور دوسرے کالج میں 12طالبات کو کلاس سے واپس گھر بھیج دیا گیا۔ حجاب گائیڈ لائنس کی بار بار خلاف ورزی کرنے پر اپیننگڈی گورنمنٹ پری-یونیورسٹی کالج کی 6 طالبات کو معطل کر دیا گیا ہے۔

کالج کے پرنسپل نے کالج کے ذمہ داروں کے ساتھ میٹنگ کرنے کے بعد حجاب والی طالبات کو معطل کرنے کا فیصلہ لیا۔ معطل 6طالبات کو سرکاری حکم اور کلاسز میں حجاب پہننے پر روک لگانے والے ہائی کورٹ کے فیصلے کی جانکاری دی گئی۔

دوسرے واقعہ میں ہمپناکٹے کے پاس منگلورو یونیورسٹی کالج کے پرنسپل نے حجاب پہن کر آئیں 16طالبات کو کلاس میں جانے کی اجازت نہیں دی اور انھیں گھر واپس بھیج دیا۔کالج کے افسروں نے بتایا کہ سنڈیکیٹ کی میٹنگ میں یہ فیصلہ لیا گیا۔ اس سے پہلے چہارشنبہ کو طالبات ضلع کمشنر کے دفتر گئی تھیں اور حجاب پہن کر کلاس میں داخل نہیں ہونے دینے کی شکایت کی تھی۔ کمشنر نے انھیں حکومت کے ضابطوں اور عدالت کے احکام پر عمل کرنے کی صلاح دی۔ حالانکہ طالبات نہیں مانیں اور جمعرات کو حجاب پہن کر کالج پہنچ گئیں۔

اڈپی پری-یونیورسٹی گورنمنٹ گرلس کالج کی 6طالبات کے ذریعہ شروع کیا گیا حجاب تنازعہ ریاست میں بین الاقوامی سطح پر سرخیاں بٹور رہا ہے۔ اس معاملے کی سماعت کیلئے تشکیل ہائی کورٹ کی خصوصی بنچ نے کلاسز میں حجاب سمیت کسی بھی مذہبی علامت والی چیز پہن کر کلاس میں جانے کے خلاف فیصلہ سنایا تھا۔ عدالت نے اسکولوں میں حجاب پہننے کی اجازت مانگنے والی طالبات کے ذریعہ داخل عرضی کو بھی خارج کر دیا تھا۔