نئی دہلی، 20؍مئی (ایس اون یوز؍یو این آئی) سوچھ بھارت ابھیان کے تحت کوڑا-کچرہ سے پاک شہروں کی سیریز میں چھ شہروں کو پانچ ستارہ کا درجہ دیا گیا ہے جن میں امبیکا پور، راجکوٹ، سورت، میسور، اندور اور نوی ممبئی شامل ہیں - اس کے علاوہ 65شہروں کو تین ستارہ اور 70شہروں کو ایک ستارہ کا درجہ دیا گیا ہے -

رہائش اور شہری امور کے مرکزی وزیر ہردیپ سنگھ پوری نے منگل کو یہاں ”کوڑا کچرا مکت شہر آکلن 2019-20“ (کوڑا کچرہ سے پاک شہر تشخیص (2019-20)جاری کرتے ہوئے کہاکہ چھتیس گڑھ کے امبیکا پور، گجرات کے راجکوٹ اور سورت، کرناٹک کے میسور، مدھیہ پردیش کے اندور اور مہاراشٹر میں نوی ممبئی کو پانچ ستارہ کا درجہ دیا گیا ہے- وزارت نے جنوری میں اس سے متعلق مہم شروع کی تھی جس کا مقصد صفائی ستھرائی کی حوصلہ افزائی کرنا تھا-

وزارت کے سکریٹری درگاشنکر مشر نے بتایا کہ اس تشخیص کے لئے 1435شہروں نے درخواست دی تھی- اس میں ایک کروڑ 19لاکھ لوگوں نے ردعمل دیا اور دس لاکھ سے زیادہ تصاویر کاجائزہ لیا گیا- کل ملا کر 1210مشاہدین نے 5175ٹھوس کچرہ پروسیسنگ مرکز کا معائنہ کیا- اس کے علاوہ 698شہروں نے تشخیص کے لئے آن لائن عمل مکمل کیا اور 141 کی فیلڈ تشخیص کی گئیں -