سرسی تعلقہ کے الیسور میں بجلی تارچھونے سے ایک گائے اور2 بیل ہلاک :ہیسکام پر الزام
سرسی:19؍جون(ایس اؤ نیوز) ٹوٹ کر گرے ہوئے بجلی کے تاروں کو چھوجانے سے تین جانور ہلاک ہونے کا واقعہ تعلقہ کے الیسور مضاف میں پیش آیا ہے۔
ہلاک شدہ جانوروں کی مالک پاروتی بنگاریا نائک نے بتایا کہ جمعرات کو چرنے کےلئے گئے جانور گھر نہیں لوٹے تو وہ جانوروں کی تلاش کے لئے نکل گئی ، دیکھا تو تینوں جانور بجلی کے تار کے قریب بے سود پڑے ہیں۔
حادثے میں ایک گائے اور کھیتی باڑی کے لئے استعمال کئےجانے والے دو بیل ہلاک ہوئے ہیں۔ زراعت کے لئے استعمال ہونے والے دونوں بیل فوت ہونے سے کسان کافی فکر مند ہیں۔
ہیسکام پر الزام : جانوروں کی ہلاکت کے لئے ہیسکام محکمہ کو مورد الزام ٹھہرایا جارہاہے۔ بجلی کے تار ٹوٹ کر زمین پر گرے ہوئے کئی دن گزر گئے تو بھی محکمہ ہیسکام کے اہلکاروں نے اس طرف کوئی توجہ نہیں دی جس کے نتیجے میں چرنے گئے بے زبان جانوروں کو اس کا خمیازہ بھگتنا پڑاہے۔ جب صبح میں تاروں پر نظر ڈالی گئی تو تب بھی تاروں میں کرنٹ تھا۔ جب مقامی عوام نے اس کی اطلاع دی تو اس کی بجلی کاٹی گئی ہے۔
مقامی عوام نے بتایا کہ کئی جگہوں پر بجلی کے تار ٹوٹ کر گرے ہوئے ہیں، عوام نے زور دیا ہے کہ ہیسکام اہلکار اس طرف فوری طورپرتوجہ دے کر عوام اور جانوروں کی حفاظت کو یقینی بنائیں۔