سرسی:24؍فروری (ایس اؤ نیوز)اترکنڑا ضلع کو تقسیم کرتےہوئے سرسی کو نیا ضلع تشکیل بنائے جانے کا مطالبہ لےکر سرسی ضلع ہوراٹا سمیتی کے اعلان کیاگیا بند 24فروری بروز بدھ کو سرسی میں کامیاب رہا۔
شہر میں دکان مالکان نے رضاکارانہ طورپر اپنی دکان اور ہوٹل وغیرہ کو بند رکھا۔ دوائی کی دکانوں کے علاوہ بقیہ سبھی طرح کی تجارتی دکانیں بند تھیں۔ پرانے بس اسٹانڈ سے بسوں کی آمدورفت بھی بند تھی ۔ سرکاری پی یو کالج کو چھٹی دی گئی تھی البتہ اسکول حسب معمول کھلی تھیں۔
پرانے بس اسٹا ئنڈ کے سرکل پر مختلف تعلقہ جات سے آئے احتجاجی متحد ہوکر احتجاج کی شروعات کی۔ سابق رکن اسمبلی وویکانند وئیدیا نے احتجاجیوں سے خطاب کرتےہوئے کہاکہ ترقی کی خاطر ضلع کی تقسیم ضروری ہے، لیکن اس سلسلے میں عوامی نمائندوں کی خاموشی تعجب خیز ہے ۔
ضلع پنچایت ممبر جی این ہیگڈے مریگار نےکہاکہ پہلے ضلع کی تشکیل ہونے دیں پھر اس کے بعد ضلعی مرکز کےمتعلق فیصلہ لیں گے۔بنواسی تعلقہ ہوراٹا سمیتی کے صدر اُدئیے کمار نے کہاکہ سیاسی حوصلہ کی کمی ہونے سے ضلع کی تشکیل نہیں ہوپارہی ہے۔ پچھلے کئی برسوں سے نئے ضلع کو لےکر جدوجہد جاری ہے، لیکن عوامی نمائندوں سے کسی طرح کی کوئی حمایت یا تائید نہیں مل رہی ہے۔ ہوراٹا سمیتی کے صدر اُپیندرا پائی ، ایم ایم بھٹ، پرمانند ہیگڈے ، منجو موگیر وغیرہ موجود تھے۔