جوئیڈا،24؍ستمبر(ایس او نیوز) آج کل سرسی کوشمالی کینرا سے الگ کرکے نیا ضلع تشکیل دینے کا پرزور مطالبہ چل رہا ہے اور دھرنے اور ریالیوں کا سلسلہ شروع ہوا ہے۔ اسی بیچ اس راہ میں ایک نئی اڑچن یہ پیدا ہوگئی ہے کہ جوئیڈا تعلقہ کے عوام خود کو کاروار ضلع میں ہی رکھنے کی مانگ کرنے لگے ہیں۔
کمبار واڈا گرام پنچایت کے سابق صدرپورشوتم کامت نے کہا کہ کچھ لوگ جوئیڈا کو مجوزہ نئے سرسی ضلع میں شامل کرنے کی مہم چلارہے ہیں، لیکن جوئیڈا کے عوام کاروار ضلع میں شامل رہنے کی خواہش رکھتے ہیں۔اور یہ جوئیڈا کے عوام کا پرزور تقاضا ہےیہاں کے عوام جوئیڈا کو کسی بھی قیمت پر سرسی ضلع میں شامل کرنے کی اجازت بالکل نہیں دیں گے۔ انہوں نے کہا کہ سرسی ضلع بنائے جانے پر انہیں کوئی اعتراض نہیں ہے ، لیکن جوئیڈا کو کاروار میں ہی رکھنا ہے، کیونکہ جوئیڈا سے سرسی کا فاصلہ 123کلو میٹر ہے ، جبکہ کاروار کا فاصلہ 70کلومیٹر ہی ہوتا ہے۔اس لئے فاصلے کے اعتبار سے بھی ہمارے لئے سرسی کے بجائے کاروار ہی قریب ہوتا ہے۔
اس موقع پر تعلقہ پنچایت رکن سریش بنگاری پروین نائک، کشور پربھو، مابلی گاواڈا، وشنو ڈیریکر، دیا نند میراشی، تکارام ویلیپ، کرشنا گاواڈا اور دیگر افراد موجود تھے۔