بنگلورو، 28؍جنوری(ایس او  نیوز)اگر مجھے دوبارہ اقتدار پر لایا جاتا تو مزید ترقیاتی کام انجام دیتا چند لوگوں نے غلط تشہیر اور حسد کی وجہ سے مجھے شکست سے دوچار کردیا۔ اتنا سب کچھ ہونے کے باوجود میں نے پوری خود اعتمادی کے ساتھ سیاست کی ۔ کسی کے سامنے سر نہیں جھکایا اور نہ کبھی ایسا کروں گا ۔ ان خیالات کااظہار سابق وزیر اعلیٰ سدارامیا نے کیا۔ بنشنکری ، جٹ گرہلی میں کنکا کمیونٹی بھون کی افتتاحی تقریب میں شرکت کرتے ہوئے انہوں نے کہا کہ پسماندہ طبقات کو چاہئے کہ وہ کمیونٹی کی خدمت کرنے والوں کا ساتھ دیں ۔ سدارامیا نے بیتے دنوں کو یاد کرتے ہوئے کہا کہ ایمبیسڈر کار میں گاؤں گاؤں قریہ قریہ جا کر کروبا سماج کو ہم نے متحد کیا ۔ کنکا جینتی مناتے ہوئے عوام میں بیداری لائی ۔ کنکا گروپیٹھ تشکیل دیا گیا ۔ ریاست کی تمام اہم ترین شخصیات کو یاد کرنے کیلئے ان کا جنم دن منایا گیا ۔ ریاست میں 700کنکا کمیونٹی بھون تعمیر کرنے کی منظوری دی گئی ۔ انہوں نے کمیونٹی کے افراد سے کہا کہ کمیونٹی بھون عوامی جائیداد کی مانند ہیں ۔ اس پرکوئی قبضہ نہ کرے۔ میں نے بھی اپنی سیاسی زندگی میں جائیداد پر قبضہ نہیں کیا ۔ سماج وکمیونٹی کے نام پراراضی ہڑپنے والے سیاستدانوں پر انہوں نے برہمی ظاہر کی ۔ سیاست میں آنے کے بعد صرف کروبا طبقہ کونہیں بلکہ تمام پسماندہ طبقات کی میں نے خدمت کی ہے ۔ انہوں نے مزید کہا کہ اسمبلی اور پارلیمانی انتخابات میں پسماندہ طبقات کی خواتین کیلئے ریزرویشن لانے کی ضرورت ہے ۔ اگر ریزرویشن نہیں لایا گیا تو پسماندہ طبقات کا کوئی بھی لیڈر سیاست میں ترقی حاصل نہیں کرپائے گا ۔ جب میں وزیر اعلیٰ تھا تو اہندا طبقات کیلئے تھوڑا زیادہ بجٹ مختص کیا تھا ۔ لیکن دیگر طبقات کو نظر انداز بھی نہیں کیا ۔مجھے فخر ہے کہ میں نے اپنے دور اقتدار میں بے شمار امدادی رقوم اور اسکیمیں جاری کیں ۔ اس موقع پر ریاستی وزیر برائے ہاؤزنگ ایم ٹی بی ناگراج نے کہا کہ کابینہ وزیر بننے کی میری خواہش کو سدارامیا نے پوری کی ۔ آئندہ دنوں میں انتخابات میں حصہ نہیں لوں گا ۔ سیاست سے ریٹائر منٹ لے لوں گا ۔ میں نے یہ فیصلہ کرلیا تھا کہ کابینہ کا وزیر بنوں یا پھر سبکدوشی اختیار کروں۔ میرے خواب کو سدارامیا نے مکمل کیا ۔ جب تک میں زندہ ہوں سدارامیا کامرہون منت رہوں گا ۔ اب وزیر بن گیا ہوں اس لئے سرگرم سیاست سے دوری اختیار کررہا ہوں ۔ سدارامیا کو ہمیشہ یاد رکھوں گا ۔ اگر میرے سینہ کو چیر دیا جائے تو وہاں صرف سدارامیا نظر آئیں گے۔