مودی دوبارہ منتخب ہونے پر ہٹلر بن جائیں گے۔ سابق وزیر اعلیٰ سدارامیا کابیان
باگلکوٹ 22؍اپریل (ایس او نیوز)سابق وزیراعلیٰ اور مخلوط ریاستی حکومت کی کوآرڈینیشن کمیٹی کے صدر سدارامیا نے باگلکوٹ میں کانگریسی امیدوار وینا کاشپناور کے لئے انتخابی مہم کے دوران کہا کہ بی جے پی والے دیش کادستور بدلنے کی بات کررہے ہیں۔ اگر دیش کے دھرم شاستر کا مقام رکھنے والے دستور کو بدلنے کی کوشش کی گئی تو پھر ملک میں خون خرابہ شروع ہوجائے گا۔
وزیر اعظم نریندرا مودی پر زبانی حملہ کرتے ہوئے سدارامیا نے کہا کہ ملک میں سب سے زیادہ جھوٹ بولنے والا وزیراعظم نریندرا مودی کی شکل میں تاریخ میں پہلی بار سامنے آیا ہے۔اگر مودی دوبارہ وزیراعظم بنتے ہیں تو وہ اس ملک کے لئے ہٹلر ثابت ہونے والے ہیں۔ سدارامیا نے کہا کہ شکست کے خوف سے مودی حکومت کانگریس اور جے ڈی ایس کے امیدواروں اور ان کے قریبی افراد پرانکم ٹیکس ڈپارٹمنٹ کی طرف سے چھاپہ مار ی کروارہی ہے۔ آنے والے دنوں میں اس کا پلٹ وار انہیں پر ہونے والا ہے۔