کوپل،7؍اپریل (ایس او نیوز) سابق ریاستی وزیراعلیٰ سدارامیا نے کہا کہ بی جے پی رہنما بابائے قوم مہاتما گاندھی کا قتل کرنے والے گوڈسے کے خاندان سے تعلق رکھتے ہیں ۔ یہاں اخباری نمائندوں سے بات کرتے ہوئے سدارامیا نے اس خیال کا اظہار کیا اور کہا کہ بی جے پی سے تعلق رکھنے والے تمام رہنماآر ایس ایس نظریات کے حامی ہیں ۔ اس لئے بی جے پی سے پسماندہ طبقات سے تعلق رکھنے والے امیدوار کو ٹکٹ نہیں دیا گیا ہے ۔بی جے پی رہنما ،سابق نائب وزیراعلیٰ ایشورپا کی جانب سے سدارامیا کو قاتل قرار دئے جانے پر تبصرہ کرتے ہوئے انہو ں نے کہا کہ ایشورپا کا تعلق قاتلوں کی ٹولی سے ہے اس لئے فطری بات ہے کہ ان کی زبان سے یہی الفاظ نکلتے ہیں ۔انہوں نے کہا کہ ایشورپا نے اپنادماغی توازن کھودیا ہے اور خود انہیں پتہ نہیں چلتا کہ وہ کیا بیان جاری کررہے ہیں ۔ انہوں نے کہا کہ کانگریس کے انتخابی منشور کو لے کر بی جے پی غلط فہمی کا شکار ہے کیونکہ ذات پات کی سیاست بی جے پی کرتی ہے کانگریس نہیں۔انہوں نے الزام لگایا کہ منڈیا پارلیمانی حلقہ میں بی جے پی کارکن پارٹی کا جھنڈا تھامے ہوئے سمالتا امبریش کی مہم میں حصہ لے رہے ہیں جو کانگریس کو بدنام کرنے کی سازش ہے ۔