بنگلورو،21؍جون (ایس او نیوز) وزیر اعلیٰ کمار سوامی کی قیادت میں مخلوط حکومت بغیر کسی دشواری یا رکاوٹ کے اپنی پانچ سالہ میعاد مکمل کرے گی۔ مخلوط حکومت کے قیام کے وقت کمار سوامی سے وعدہ کیا گیا تھا کہ وہ پانچ سالہ میعاد کیلئے وزیراعلیٰ ہوں گے۔ اس وعدے سے منھ پھیر نے کا سوال ہی نہیں ہے۔ مخلوط حکومت اپنی میعاد مکمل کرے اس بات کو یقینی بنایا جائے گا۔ ریاست کے سابق وزیراعلیٰ اور مخلوط حکومت کی کوآرڈی نیشن کمیٹی کے صدر سدارامیا نے کانگریس پارٹی کے قومی صدر راہل گاندھی کو ان باتوں کا بھروسہ دیا ہے۔ دہلی میں راہل گاندھی کے ساتھ ملاقات کے دوران سدارامیا نے کہا کہ ملک کا اقتدار فرقہ پرست طاقتوں کے ہاتھوں میں ہے۔ ان حالات میں کانگریس پارٹی کو نہایت احتیاط سے کام کرنے کی ضرورت ہے۔انہوں نے کہا کہ لوک سبھا انتخابات میں جنتادل ایس کے ساتھ اتحاد سے کانگریس اورجتنادل دونوں پارٹیوں کو نقصان ہوا۔ اگر دوستانہ مقابلہ ہوتا تو دونوں پارٹیوں کو کم سے کم 10سیٹوں پرجیت حاصل ہوتی۔ اس کا یہ مطلب نہ لیا جائے کہ میں مخلوط حکومت گرانے کی کوشش کررہا ہوں۔ میں مخلوط حکومت کو کوئی نقصان نہیں پہنچاؤں گا۔ مجھ سے مخلوط حکومت کو کوئی خطرہ نہیں ہے۔ سدارامیا نے کہا کہ کانگریس پارٹی کو مضبوط کرنے کی ضرورت ہے۔ قومی سطح پر پارٹی کافی کمزور ہوگئی ہے۔ راہل نے ایسے حالات میں پارٹی کی قیادت سنبھالی ہے۔ پارٹی کو دوبارہ طاقتور بنانے کیلئے راہل کے ہاتھ مضبوط کرنا ہی میرا مقصد ہے۔