بنگلورو،22؍فروری(ایس او نیوز) سابق وزیراعلیٰ اور کانگریس لیجسلیچر پارٹی لیڈر سدرامیا نے کہا ہے کہ آنے والے لوک سبھا انتخابات کے بعد یہ بات صد فیصد طے ہے کہ مودی ملک کے وزیراعظم نہیں بنیں گے۔

اخباری نمائندوں سے بات چیت کرتے ہوئے انہوں نے کہاکہ لوک سبھا انتخابات کے بعد صدر کانگریس راہل گاندھی کا وزیراعظم بننا طے ہے۔ ملک کی وہ تمام سیاسی جماعتیں جو سیکولرزم اور جمہوریت پر یقین رکھتی ہیں وہ چاہتی ہیں کہ مودی دوبارہ ملک کے وزیراعظم بننے نہ پائیں۔ لوک سبھاانتخابات میں اگر کانگریس کا مظاہرہ بہترین رہا تو اس بات میں دو رائے نہیں کہ راہل گاندھی ملک کے اگلے وزیراعظم ہوں گے۔

کرناٹک میں کانگریس جے ڈی ایس اتحاد کے متعلق سوال پر سدرامیا نے کہاکہ دونوں پارٹیوں میں جتنی سیٹیں جیتنے کی صلاحیت ہے اس کا جائزہ لینے کے بعد طے ہوگا کہ ریاست کی 28 میں سے کس پارٹی کو کتنی سیٹیں ملنی چاہئیں۔ وزیر برائے تعمیرات عامہ ایچ ڈی ریونا کے اس بیان پر کانگریس نے جے ڈی ایس کو اگر بارہ سیٹیں نہیں دیں تو جے ڈی ایس تنہا مقابلہ کرے گی، سدرامیا نے کہاکہ انہوں نے ریونا کا بیان دیکھا ہے اس پر کسی طرح کا تبصرہ قبل از وقت ہوگا۔ کیونکہ سیٹوں کے بٹوارے پر دونوں پارٹیوں کے درمیان ابھی بات چیت نہیں ہوئی ہے، بات چیت کے بعد ہی دونوں کو اپنا موقف وضع کرنا ہے۔

اس سے قبل جس حلقے سے بھی بیان بازی کی جائے اس کی کوئی اہمیت نہیں ہے۔ سابق وزیر اعظم ایچ ڈی دیوے گوڈا کے میسور پارلیمانی حلقے سے انتخاب لڑنے کے متعلق خبروں پر تبصرے سے گریز کرتے ہوئے سدرامیا نے کہا کہ اس بارے میں انہیں کوئی علم نہیں۔ لوک سبھا انتخابات کے لئے پارٹی ابھی تیاریوں میں لگی ہوئی ہے۔ سابق مرکزی وزیر اور فلم اداکار امبریش کی بیوہ سوما لتا کے منڈیا حلقے سے میدان میں اترنے کے بارے میں بھی سابق وزیراعلیٰ نے کہاکہ ابھی اس کا کوئی فیصلہ نہیں ہوا ہے۔ کانگریس پارٹی کے سبھی سینئر رہنما اس کا فیصلہ کریں گے۔