سدارامیا کے فوراً وزیراعلیٰ بن جانے کی بات میں نے نہیں کہی، موجودہ مخلوط حکومت 5سالہ میعاد پوری کرے گی؛ ضمیر احمدخان کا بیان
بنگلورو، یکم مئی (ایس او نیوز) ریاستی وزیر برائے اقلیتی امور، حج اور غذا و شہری رسدات بی زیڈ ضمیر احمد خان نے کہا کہ ابھی بھی سدارامیا ہی ان کے لیڈر ہیں - لیکن انہوں نے سدارامیا کے کل ہی وزیر اعلیٰ بن جانے کی بات کہیں بھی نہیں کی ہے- انہوں نے بتایا کہ آئندہ اسمبلی انتخابات کے بعد وزیر اعلیٰ بننے کی بات سدارامیا نے کہی ہے- انہوں نے کہا کہ وہ سدارامیا کو دوبارہ وزیر اعلیٰ کے طور پر دیکھنا چاہتے ہیں - یہی ان کے خواہش بھی ہے- ریاستی عوام بھی چاہتے ہیں کہ سدارامیا پھر وزیر اعلیٰ کے طورپر خدمت انجام دیتے ہوئے پاک و صاف انتظامیہ فراہم کریں - انہوں نے امید ظاہر کی کہ سدارامیا اگلے اسمبلی انتخابات کے بعد وزیر اعلیٰ ضرور بنیں گے- فی الحال موجود مخلوط حکومت کے وزیر اعلیٰ ایچ ڈی کمار سوامی اپنی 5سالہ میعاد پوری کرلیں گے-
ضمیر احمد نے کہا کہ مخلوط حکومت کی کوئی خطرہ نہیں ہے- یہ حکومت عوامی مفادات کے پروگرامس جاری کرتے ہوئے ہر ایک کو ان پروگرامس سے استفادہ کرنے کے مواقع فراہم کررہی ہے-آپریشن کنول کے متعلق وزیر موصوف نے کہا کہ ہر کوئی رات کے وقت خواب دیکھتا ہے لیکن بھارتیہ جنتا پارٹی (بی جے پی) دن میں خواب دیکھنے لگی ہے جو کبھی بھی شرمندہ تعبیر نہیں ہوں گے- انہوں نے کہا کہ بی جے پی کے ریاستی صدر بی ایس ایڈی یورپا درمیانی شب نیند سے بیدار ہوکر وزیراعلیٰ نہ بننے پر افسوس کا اظہار کرنے لگے ہیں - ضمیر احمد نے پیشن گوئی کرتے ہوئے کہا کہ ایڈی یورپا اب دوبارہ وزیر اعلیٰ نہیں بنیں گے- کیونکہ ان کی پارٹی میں ان کا کوئی مقام نہیں ہے- جس طرح ایل کے اڈوانی کو پارٹی سے مکمل طور پر نظر انداز کردیا گیا ہے اسی طرح ریاست میں بھی ایڈی یورپا کو بی جے پی نظر انداز کردے گی- انہوں نے کہا کہ سابق وزیر رمیش جارکی ہولی کے جسم میں کانگریس کا خون دوڑرہا ہے وہ کبھی بھی کانگریس کو خیر باد کہنے والے نہیں ہیں - انہوں نے کہا کہ وزارت سے ہٹائے جانے پر وہ ناراض ضرور ہیں لیکن وہ کانگریس چھوڑکر بی جے پی فرقہ پرست پارٹی میں ہرگز شمولیت اختیار نہیں کریں گے-ضمیر احمد نے کہا کہ جارکی ہولی برادران میں کسی بھی قسم کے اختلافات نہیں ہیں - دونوں بھائیوں میں کافی محبت ہے- بی جے پی جتنی بھی کوشش کرلے جارکی ہولی برادران بی جے پی میں شامل نہیں ہوں گے-