فرقہ پرست طاقتوں کے خلاف لڑائی میں دیوے گوڈا کا اہم رول: نائب وزیر اعلیٰ پرمیشور
ٹمکور،4؍ اپریل (ایس او نیوز) ملک میں فرقہ پرست طاقتوں کے خلاف لڑائی میں سابق وزیر اعظم دیوے گوڈا کا اہم رول ہے۔ٹمکور پارلیمانی حلقہ کے ووٹر ،کانگریس اور جنتادل سکیولر پارٹیوں کے کارکن انہیں ٹمکور لوک سبھا حلقہ تک ہی محدود نہ رکھیں ،دیوے گوڈا ،کانگریس پارٹی کے قومی صدر راہل گاندھی کے ساتھ مل کر پوری ریاست میں مخلوط حکومت کے امیدواروں کے حق میں انتخابی مہم چلائیں گے۔اس حلقہ سے انہیں اکثریت کے ساتھ کامیاب کرنا حلقہ کے ووٹروں کی ذمہ داری ہے، ان خیالات کا اظہار ریاست کے نائب وزیر اعلیٰ ڈاکٹر جی پرمیشور نے کیا۔اس ملک میں جمہوریت کی بقاکے لئے لوک سبھا انتخابات میں بھارتیہ جنتا پارٹی کی شکست بے حد ضروری ہے۔بی جے پی جیسی فرقہ پرست پارٹی کو اقتدار سے دور رکھنے کے لئے مہا گٹھ بندھن بنایا گیا ہے۔کانگریس پارٹی نے مختلف ریاستوں میں مختلف سیاسی پارٹیوں کے ساتھ اتحاد کیا ہے۔ آج ملک میں دستور بدلنے کی باتیں ہورہی ہیں۔ملک کے سکیولر ڈھانچے کو تباہ کرنے کی کوشش ہورہی ہے۔ایسے حالات میں سکیولر نظریات رکھنے والے تمام افراد کو چاہئے کہ وہ آپس میں متحد ہوں اور فرقہ پرست طاقتوں کے خلاف آواز بلند کریں۔ریاستی وزیر ایس آر سرینواس نے کہا کہ اس ملک میں اگر جھوٹ بولنے والوں کا مقابلہ رکھا گیا تو سوائے وزیر اعظم مودی کے کسی دوسرے شخص کو انعام نہیں ملے گا۔اس طرح جھوٹ بولنے کے معاملے میں ٹمکور ضلع میں بی جے پی کے لوک سبھا امیدوار بسواراج اول ہیں۔اس حلقہ سے 4؍ مرتبہ رکن پارلیمان منتخب ہونے والے شخص کو مودی کے نام پر ووٹ طلب کرنا زیب نہیں دیتا۔اجلاس میں سابق رکن اسمبلی شفیع احمد، سابق رکن کونسل، رمیش بابو، ضلع پنچایت صدر لتا، میئر للیتا ،ڈپٹی میئر روپا اور دیگر شریک رہے۔