بنگلورو۔10/مئی(ایس او نیوز) ریاستی ہائی کورٹ کے چیف جسٹس کے طور پر آج جسٹس ابھئے سرینواس اوکا نے اپنا عہدہ سنبھال لیا۔ راج بھون میں منعقدہ تقریب میں گورنر واجو بھائی والا نے نئے چیف جسٹس کو عہدے اور راز داری کا حلف دلایا، اس موقع پر وزیراعلیٰ ایچ ڈی کمار سوامی، ان کی کابینہ کے رفقاء اور دیگر اہم شخصیتیں موجود تھیں۔
بامبئے ہائی کورٹ کے جج ابھئے سرینواس اوکا کو حال ہی میں صدر ہند نے ریاستی ہائی کورٹ کے چیف جسٹس کے عہدے پر نامزد کیاتھا۔اس سے پہلے سابق چیف جسٹس دنیش مہیشوری کو سپریم کورٹ کے جج کے عہدے پر ترقی دی گئی تھی اس وقت سے ریاستی ہائی کورٹ میں کل وقتی چیف جسٹس کا عہدہ خالی تھا۔
آج چیف جسٹس کے طورپر عہدہ سنبھالنے والے جسٹس اوکا 2003 سے بامبئے ہائی کورٹ میں بطور جج برسر خدمت تھے، اس سے پہلے وہ پیشہئ وکالت سے منسلک رہے، بامبائی یونیورسٹی سے بی ایس سی اور ایل ایل ایم کرنے کے بعد تھانے سیشن کورٹ میں انہوں نے اپنی وکالت اپنے والد کے ساتھ شروع کی تھی۔ 1985میں وہ بامبئے ہائی کورٹ کے سابق جج جسٹس وی پی ٹپنس کے ساتھ ہائی کورٹ کے وکیل بنے۔ 2003میں انہیں بامبئے ہائی کورٹ کے اڈیشنل جج کے طور پر مقرر کیاگیا اور 2005 میں وہ کل وقتی جج بن گئے۔
آج کی تقریب حلف برداری میں چیف سکریٹری آئی ایم وجئے بھاسکر، نائب وزیر اعلیٰ ڈاکٹر جی پرمیشور، ہائی کورٹ کے نگراں چیف جسٹس جسٹس نارائن سوامی، ہائی کورٹ کے دیگر ججوں کے علاوہ بامبئے ہائی کورٹ کے چند ججوں، لوک آیوکتہ جسٹس وشواناتھ شٹی، انسانی حقوق کمیشن کے چیرمین جسٹس واگھیلا، وظیفہ یاب چیف جسٹس رما جوائس، میئر گنگامبیکے وغیرہ موجود تھے۔