ٹک ٹاک کی لعنت ،17/سالہ لڑکے کی گئی جان،پستول کے ساتھ ٹک ٹاک ویڈیو شوٹ کے دوران چلی تھی گولی، دو گرفتار
احمد نگر،15/جون (ایس او نیوز/ آئی این ایس انڈیا) ’ٹک ٹاک‘ پر صرف اخلاق سوز ویڈیو ہی نہیں بنائے جاتے؛بلکہ اپنے ویڈیوکو ’ہٹ‘ کرنے کے لیے عجیب و غریب حرکتیں بھی کی جاتی ہیں، تاہم اسی عجیب و غریب حرکت کے باعث مہاراشٹر کے شری ڈی میں ٹک ٹاک ویڈیو بنانے کے دوران گولی چلنے سے ایک نوعمر لڑ کا ہلاک ہوگیا۔ پولیس کے مطابق حادثہ بدھ کو ہوا اور اس میں 17/ سالہ نوعمر لڑکا پرتیک واڈیکر ہلاک ہوگیا۔ پولیس کے مطابق پرتیک اپنے اہل خانہ رشتہ دار کے ساتھ ایک شخص کے آخری رسومات کی تقریب میں شرکت کے لیے شرڈی آیا ہوا تھا اور ایک ہوٹل میں مقیم تھا۔ہوٹل میں پرتیک، سنی پوار، نتن واڈیکر اور 11 سالہ ایک اور لڑکے نے پستول لے کر بدنام زمانہ آن لائن ویڈیو ایپ ٹک ٹاک پر ویڈیو پوسٹ کرنے کی غرض سے ویڈیو بنانا شروع کیا، اسی دروان اتفاقاً پستول کا ٹریگر دب گیا اور گولی پرتیک واڈیکر کو جا لگی، جس سے پرتیک موقعہ پر ہی ڈھیر ہوگیا۔ شرڈی پولیس تھانے کے انسپکٹر انل نے بتایا کہ پستول پرتیک واڈیکر کا ہی ایک رشتہ دار لے کر آیا تھا،واقعہ میں شامل دیگر دونوں لڑکوں کو گرفتار کرلیا گیا ہے۔ واضح ہو کہ ٹک ٹاک ایک سوشل میڈیا ایپ ہے اور بھارت میں اس کے 20 کروڑ صارفین ہیں، جن میں 80فیصدی تعداد نوعمر لڑکے اور لڑکیوں کی ہے۔ ان صارفین میں سے 12 کروڑ فی ماہ فعال رہتے ہیں، تاہم اس سے معاشرہ میں برائی بڑھ رہی ہے اور نوعمر لڑکے اور لڑکیوں میں غیراخلاقی اور رذیل حرکتیں واقع ہو رہی ہیں۔ کچھ دنوں پہلے مدراس ہائی کورٹ نے اس پر پابندی لگا ئی تھی، لیکن بعد میں پابندی ہٹالی گئی تھی۔ والدین کو اس پر خصوصی توجہ دینے کی ضرورت ہے، ورنہ معاشرہ کے لاکھوں ’پرتیک‘کی جان داؤ پر لگی ہے۔