کانپور: دوکاندارنے بل کے نیچے لکھا، ’’اسلام واحدحل‘‘ کیا ایسا لکھنا بھی جرم ؟
کانپور،21؍اکتوبر(ایس او نیوز؍ایجنسی) کانپور میں ایک دکاندار پر اس بات کا الزام لگا ہے کہ وہ نئے طریقے سے اسلام کو فروغ دینے کی کوشش کررہا ہے ۔ میڈیا میں آ ئی خبروں کے مطابق متعلقہ دکاندار نے اپنے بل کے نیچے ’اسلام دی اونلی سلوشن ‘ لکھ رکھا ہے اور یہی بل وہ صارفین کو دیتا تھا۔
پتہ چلا ہے کہ اس بل کی کاپی کسی طرح سوشل میڈیا پر وائرل ہوئی تو انتظامیہ میں ہڑکمپ مچ گیا۔ فی الحال دکاندار سے کانپور پولیس پوچھ گچھ کررہی ہے۔
کانپور کے سابق کمشنر اور آئی اے ایس افسر افتخار الدین پر تبدیلی مذہب کی تحقیقات خود کانپور میں جاری ہے ، اس لیے اس معاملہ کو سوشل میڈیا میں جوڑ کردیکھا جا نے لگا ہے۔ معاملہ کے طول پکڑنے کے بعد پولیس نے دکاندار سے پوچھ گچھ شروع کردی ہے۔
کانپور کے میسٹن روڈ میں بیچ والے مندر کے پاس والی گلی میں سلیم نام کے شخص کی دکان ہے ۔ یہ پلاسٹک کی دکان ہے ۔ جس کی کئی اضلاع میں سپلائی ہے۔ اس دکان کا ایک بل 4750 روپے کا سامنے آیا ہے، جس میں سب سے نیچے لکھا ہے کہ ’ اسلام دی اونلی سلوشن ‘ یہ بل اسی 18 اکتوبر کا بنا ہوا ہے ۔
بتایا جارہا ہے کہ بل کے ذریعے مبینہ اسلام کی تبلیغ پر سوشل میڈیا پر شدید تنقید کی جارہی ہے۔ کانپور کمشنر نے فوراً معاملے کی جانچ ڈی سی پی پرمود کمار کو کرنے کا حکم دیا۔ ڈی سی پی کی ٹیم نے دکاندار کو بلاکر پوچھ گچھ شروع کردی۔