سادھوی پرگیہ سنگھ کو بی جےپی امیدوار بنائے جانے کا اعلان کرنے کے دوران بی جےپی ترجمان پر پھینکا گیا جوتا
نئی دہلی 18/اپریل (ایس او نیوز) بھوپال سے سادھوی پرگیہ سنگھ کو بی جےپی اُمیدوار کا اعلان کرنے کے موقع پر بلائی گئی پریس کانفرنس میں بی جے پی ترجمان جی وی ایل نرسمہا راو پر اچانک جوتا پھینکا گیا جس سے ہر کوئی ششدر رہ گیا۔
ذرائع سے ملی اطلاع کے مطابق دہلی میں واقع بی جے پی ہیڈکوارٹر میں جب پارٹی کے سینئر لیڈر اور ترجمان جی وی ایل نرسمہا راؤ اور بھوپیندر یادو پریس کانفرنس کر رہے تھے تو اچانک ایک جوتا جی وی ایل نرسمہا راؤ کو جا لگا جس کے فوری بعد جوتا پھینکنے والے کو وہاں پر موجود سیکورٹی اہلکاروں نے پکڑ کر ہال سے باہر نکال دیا اور بعد میں اُسے پولس کے حوالے کر دیا گیا۔
ذرائع سے ملی اطلاع کے مطابق جوتا اُس وقت پھینکا گیا جب راو کانگریس پر نکتہ چینی کرتے ہوئے کہہ رہے تھے کہ اپوزیشن ہندوتوا کارکنوں جس میں سادھوی پرگیہ سنگھ ٹھاکر بھی شامل ہیں پر جھوٹے کیسس عائد کرکے ہندووں کی توہین کرتی ہے۔جوتا پھینک کر مارنے کے واقعہ کے بعد ہال میں افرا تفری مچ گئی۔ اس درمیان سیکورٹی اہلکاروں نے اسے اپنی گرفت میں لے لیا۔ پھر جوتا پھینکنے والے نے اپنی جیب سے ایک وزیٹنگ کارڈ نکال کر اچھال دیا جس پر اُس کا نام ’شکتی بھارگو‘ لکھا ہوا تھا۔
اطلاع کے مطابق شکتی بھارگو کانپور کا رہنے والا ہے اور وہ ہال میں سب سے آگے بیٹھا ہوا تھا۔ صحافیوں نے اس سے جوتا پھینکنے اور ان کی ناراضگی کا سبب پوچھنے کی کوشش کی مگر سیکورٹی اہلکار اسے پکڑ کر فوراً باہر لے گئے اس لیے اُسے جواب دینے کا موقع نہ مل سکا۔ پولس بھارگو سے پوچھ تاچھ کر رہی ہے۔
خیال رہے کہ مالیگاوں بم دھماکہ معاملے میں سادھوی پرگیہ سنگھ ٹھاکر ضمانت پر رہا ہیں، وہ اسی ہفتہ بی جے پی میں شامل ہوئی تھی اور بی جے پی فوراً اسے بھوپال سے اُمیدوار بنانے کا فیصلہ کیا جہاں کانگریس کے سنئیر لیڈر دگوجئے سنگھ کے ساتھ اس کا مقابلہ ہوگا۔
بھوپال میں انتخابات 12 مئی کو چھٹے مرحلے میں ہوں گے۔