بنگلورو،16جون (ایس او نیوز/ایجنسی)آئی ایم اے کے متاثرین کو انصاف اور ان کا حق دلانے کے سلسلہ میں آج شہر کے آنند راؤ سرکل پر واقع گاندھی مجسمہ کے روبرو بی جے پی مائنارٹی مورچہ کے ریاستی صدر عبدالعظیم کی صدارت میں ایک اہم اجلاس طلب کیا گیا تھا، جس میں آئی ایم اے کے سینکڑوں متاثرین سرمایہ کاروں نے شرکت کی اور اپنی اپنی داستان بی جے پی کے ریاستی صدر بی ایس ایڈی یورپا اور رکن پارلیمان و پارلیمان میں چیف وہپ شوبھا کرند لاجے کو سنائی۔ اس موقع پر عبدالعظیم نے آئی ایم اے کے متاثرین کی جانب سے ایک عرضداشت ایڈی یورپا کو پیش کی ہے۔ جس میں کہا گیاہے کہ آئی ایم اے دھوکہ کی جانچ سی بی آئی کے ذریعہ کروائی جائے۔آئی ایم اے کے اس دھوکہ کو قومی آفت قرار دے کر متاثرین کو مرکزی اور ریاستی حکومت کی جانب سے مناسب معاوضہ دلایا جائے اور آئی ایم اے کا بانی و ایم ڈی دھوکہ باز منصور خان جہاں کہیں بھی ہے اس کو گرفتار کرکے لایا جائے۔اس موقع پر عبدالعظیم نے ایڈی یورپا کو بتایا کہ وہ ایک سابق پولیس افسر ہیں۔ ان کی مختلف جانچوں کو سراہتے ہوئے محکمہ پولیس کی جانب سے شرلاک ہومس کا خطاب بھی دیا گیا تھا۔ وہ جانچ پڑتال میں کافی مہارت رکھتے ہیں۔ اگر انہیں دوبارہ کٹریکٹ کی بنیاد پر تقرر کرکے ایس آئی ٹی کا چیف بنایا جائے تو نہ صرف منصور خان کو صرف تین ماہ میں گرفتار کرکے لائیں گے بلکہ ان کی تمام املاک کا پتہ لگا کر منصفانہ جانچ کریں گے۔ انہوں نے یہ بھی کہا کہ ریاست کی راجدھانی میں اتنا بڑا گھپلہ ہوا اور اس گھپلہ میں غریبوں کے کروڑوں روپئے ہیں مگر افسوس کہ ریاستی وزیر اعلیٰ کمار سوامی نے اب تک جائے موقع پر پہنچ کر متاثرین کو دلاسہ دینے کی بھی ضرورت نہیں سمجھی۔ متاثرین کی جانب سے عرضداشت قبول کرنے کے بعد ایڈی یورپا نے پارلیمان میں چیف وہپ شوبھا کو ذمہ داری دی ہے کہ وہ مرکزی وزیرفائنانس، وزیر داخلہ اور وزیر خارجہ امور سے ریاست کے دیگر ارکان پارلیمان سمیت ملاقات کرکے اس معاملہ میں مناسب اقدامات کرتے ہوئے منصور خان کو گرفتار کرنے کا مطالبہ کریں۔ اس موقع پر بی جے پی قائدین آر۔ اشوک، کٹا سبرامنیم نائیڈو، چاند پاشاہ، محمد کبیر اور بی جے پی کے کئی اراکین بھی حاضر رہے۔