چوتھی مرتبہ مدھیہ پردیش کے وزیر اعلی بنے شیوراج سنگھ ، اکیلے ہی راج بھون میں لیا حلف
بھوپال،24؍مارچ (ایس او نیوز؍ایجنسی)مدھیہ پردیش کے گورنر لالجی ٹنڈن نے آج رات گورنر ہاؤس میں شیوراج سنگھ چوہان کو ریاست کے وزیراعلی کے عہدہ کا حلف دلایا ۔ گورنر ہاؤس میں منعقدہ ایک مختصر تقریب میں شیوراج سنگھ چوہان نے عہدہ اور رازداری کا حلف لیا ۔ اس موقع پر سابق وزیراعلی کمل ناتھ ، ریاست کے بی جے پی کے سینئر عہدیداران ، اراکین اسمبلی اور ریاستی حکومت کے سینئر اہلکار موجود تھے ۔
کورونا وائرس کی وبا کی وجہ سے حلف برداری کی تقریب سے میڈیاکو دور رکھا گیا ۔ اس پروگرام میں بہت ہی کم لوگوں کو دعوت دی گئی تھی۔ حلف لینے کے بعد وزیر اعلی کے طور پر اپنی پہلی ہی تقریر میں شیوراج سنگھ چوہان نے کورونا وائرس کا تذکرہ کیا ۔ انہوں نے کہا کہ کورونا سے نمٹنے کیلئے ریاست میں پوری تیاری کی جارہی ہے اور اس پر ہم سبھی مل کر جیت درج کریں گے ۔ بعد ازاں وزیر اعلی افسران کے ساتھ میٹنگ کیلئے روانہ ہوگئے ۔
خیال رہے کہ شیوراج سنگھ چوہان کی حلف برداری تقریب میں شامل ہونے کیلئے بی جے پی ممبران اسمبلی تین بسوں میں سوار ہوکر راج بھون پہنچے ۔ حالانکہ کورونا کی وجہ سے پروگرام میں کوئی بھی کارکن موجود نہیں تھا ۔ وہیں ممبران اسمبلی بھی اپنے حامیوں کے بغیر ہی راج بھون پہنچے ۔
