شیوپرکاش دیوراج بنے ضلع شمالی کینرا کے نئے ایس پی۔ ونائیک پاٹل کا کلبرگی تبادلہ۔ بھٹکل سب انسپکٹر کا بھی تبادلہ
بھٹکل 20/اگست (ایس اونیوز)ضلع شمالی کینرا کے نئے سپرنٹنڈنٹ آف پولیس کے طور پر شیوپرکاش دیوراج کو تعینات کیا گیا ہے، جبکہ موجودہ ایس پی ونائیک پاٹل کا تبادلہ کلبرگی کے لئے کردیاگیا ہے۔
ونائیک پاٹل نے جنوری 2017سے ضلع شمالی کینرا کے لئے ایس پی کا عہد ہ سنبھالا تھا۔اپنے تبادلے کے بعد ونائک پاٹل نے کاروار میں اخبارنویسوں سے اپنے تاثرات بیان کرتے ہوئے کہا کہ ضلع شمالی کینرا میں ڈھائی سال کا عرصہ کافی خوشگوار گزرا۔ دو ایک مرتبہ ذراسی مشکلات پیش آئیں لیکن مجموعی طور پر ضلع کے تمام عوام کاپورا تعاون ملا۔اس وجہ سے یہاں کے حالات کو پرامن بنائے رکھنے میں مدد ملی۔اس ضلع میں میری تعیناتی کے دور میں دو انتخابات کا مرحلہ پرسکون اور امن کے ساتھ گزرگیا۔گزشتہ ڈیڑھ سال کے دوران تو کوئی چھوٹا سا بھی ناخوشگوار واقعہ نہیں ہوا ہے۔عوامی منتخب نمائندے اور افسران وغیرہ کے ساتھ ایک ٹیم کی شکل میں فرائض انجام دینے سے حالات کو پرامن رکھنا آسان ہوگیا۔
ہوناور میں پریش میستھاکی مشکوک موت کے بعد کمٹہ اور سرسی میں ہوئے پرتشدد احتجاج کے حوالے سے ونائیک پاٹل نے کہا کہ اس وقت پولیس عملے کی کمی کے باوجود کشیدہ حالات کو قابومیں کرلیا گیاتھا اور قانون کے دائرے میں رہتے ہوئے ثبوتوں کی بنیا دپر ہی قانون شکنی کرنے والوں کے خلاف کارروائی کی گئی تھی۔ایسے واقعات سے ہمیں مزید سبق سیکھنے اور تجربہ حاصل کرنے کا موقع ملتا ہے۔اور یہی بات دیکھنے کی ہوتی ہے کہ ایسے حساس معاملات میں بھی ہمارا کیا رول ہوتا ہے۔
کاروار میں ایس پی کا چارج سنبھالنے والے2014 کے آئی پی ایس ، شیوپرکاش دیوراج نے ساحل آن لائن سے فون پر گفتگو کرتے ہوئے بتایا کہ اُن کا تعلق سے آندھرا سے ہے، وہ اس سے پہلے منڈیا میں تھے، جہاں ایک سال تک ایس پی کی خدمات انجام دی، وہاں سے ان کا تبادلہ اُترکنڑا کے لئے کیا گیا ہے۔
بھٹکل پی ایس آئی کا بھی تبادلہ: اس بار سرکار کی طرف سے پولیس افسران کے جو تبادلے ہوئے ہیں اس میں بھٹکل ٹاؤن پولیس اسٹیشن کے سب انسپکٹر کسومادھر کا نام بھی شامل ہے۔ ان کا تبادلہ بھٹکل سے ضلع جنوبی کینرا کے مہیلا پولیس اسٹیشن میں کردیا گیا ہے۔جبکہ ونئے بیلّوا کو ٹریفک پولیس اسٹیشن سے کاروارکے مہیلا پولیس اسٹیشن میں ٹرانسفر کردیا گیا ہے۔شیوکمار بی کو سرسی مضافاتی پولیس اسٹیشن سے کاروار ہیسکام، سنیل کمار ایم ایس کو ڈانڈیلی مضافاتی پولیس اسٹیشن سے ریاستی خفیہ محکمے،شریدھر ایس آر کو ڈی ایس پی سے سی ایس پی میں بھیج دیا ہے۔ اس کے علاوہ بسواراج کامن بیل کو ساگر مضافاتی پولیس اسٹیشن سے ڈی ایس آر کاروار، گریش کمار ایس کو کاروار مضافاتی تھانے سے کے ایل اے، سنتوش کائکینی کو ہوناور سے نکسل نگرانی دستے اور چندرشیکھر ہری ہر کو یلاپور سے سی ایس پی میں بھیجا گیا ہے۔