ممبئی،24؍نومبر(ایس او نیوز؍ایجنسی)ممبئی میں کراچی بیکری  کے نام پر تنازع کے بیچ سابق وزیراعلیٰ دیویندر فرنویس کے اس بیان  کہ ’’کراچی بھی ایک دن ہندوستان کا حصہ ہوگا‘‘ سنجے راؤت نے طنز کرتے ہوئے پیر کو کہا کہ ’’کراچی بعد میں جائیں گے، پہلے وہ کشمیر تو واپس لے لو جس پر  پاکستان نے قبضہ کررکھا ہے۔‘‘ 

 یاد رہے کہ باندرہ میں واقع کراچی سویٹس کا نام بدلنے کے مطالبے پر سنیچر کو جب دیویندر فرنویس کا جواب جاننے کی کوشش کی گئی تو انہوں   نے کہا کہ ’’ہم اکھنڈ بھارت پر یقین رکھتے ہیں، ہمیں  یقین ہے کہ ایک دن کراچی بھی ہندوستان کا حصہ ہوگا۔‘‘ کراچی سویٹس کا نام بدلنے کا مطالبہ شیوسینا کے لیڈر نندگاؤنکر نے کیاہے تاہم اس کے فوراً بعد سنجے راؤت نے صفائی دی کہ یہ شیوسینا کا سرکاری موقف نہیں ہے۔انہوں  نے اس بات کا اعتراف کیا کہ مذکورہ دکان 60؍ سال سے ہے۔ فرنویس کے اکھند بھارت والے بیان پر این سی پی کے ترجمان اور ریاستی وزیر نواب ملک نے ہندوستان، پاکستان اور بنگلہ دیش کے اتحاد کی تائید کی اور کہا کہ ’’جب برلن کی دیوار گر سکتی ہے تو یہ تینوں ملک ایک کیوں نہیں ہوسکتے۔ اگر بی جےپی تینوں ملکوں کو ملا کر ایک ملک بنانا چاہتی ہے تو ہم تائید کریں گے۔‘‘

 فرنویس بھول جانا چاہتے ہیں کہ سابق وزیراعلیٰ دیویندر فرنویس جنہیں  نومبر 2019ء میں  راتوں رات وزیراعلیٰ کا حلف لینے کے 80؍ گھنٹے بعد استعفیٰ دینا پڑاتھا،  ا ب اس واقعہ کو بھول جانا چاہتے ہیں۔ پیر کو اس سلسلے میں پوچھے گئے ایک سوال کے جواب میں  سابق وزیراعلیٰ  کا کہناتھا کہ ’’اس واقعہ کو یاد رکھنے کی ضرورت  نہیں ہے۔‘‘ انہوں نے کہا کہ اب اگر مہاوکاس اگھاڑی حکومت گرتی ہے تو اس کی جگہ لینےوالی حکومت کی حلف برداری علی الصباح نہیں ہوگی۔