بھٹکل:16؍ستمبر(ایس اؤ نیوز) بھٹکل تعلقہ کے شرالی میں پلاسٹک کے استعمال سے غلاظت بھرے کچرے کا مسئلہ پیدا ہونے کے پیش نظر اور ضلع پنچایت سی ای اؤ کی ہدایات پر پیر کو شرالی گرام پنچایت حدود کے کئی دکانوں پر چھاپہ ماری کرتے ہوئے 28.45 کلوگرام وزنی پلاسٹک کی تھیلیاں ضبط کرنے کا واقعہ پیش آیاہے۔

پنچایت ترقی جات افسر چندرشیکھر، سکریٹری اُدئیے بورکر اور عملہ چھاپہ ماری کارروائی میں شریک تھا۔ شرالی میں کچرانکاسی مرکز قائم ہے اور اس کے لئے امداد بھی منظور کی گئی ہے ، شرالی گرام پنچایت حدود میں پلاسٹک استعمال پر مکمل پابندی ہے۔ آئندہ سے کسی بھی دکان وغیرہ میں پلاسٹک اشیاء کا پتہ چلا تو جرمانہ عائد کرنے کا افسران نے انتباہ دیا۔