بینگلورو : سرکاری بسوں میں خواتین کے لئے مفت - جاری ہونگے سمارٹ کارڈ
بینگلورو،6 / جون (ایس او نیوز) ریاستی حکومت کی طرف سے "شکتی" اسکیم کے تحت تمام خواتین کے لئے سرکاری بسوں میں مفت سفر کی جو سہولت فراہم کی جا رہی ہے اس سلسلے میں رہنما اصول جاری کیے گئے ہیں ۔
اس اسکیم کے تحت طالبات اور دیگر تمام خواتین بشمول ہیجڑے کرناٹکا روڈ ٹرانسپورٹ کارپوریشن (کے ایس آر ٹی سی)، اس سے متعلقہ دیگر سرکاری بسوں اور بینگلورو میٹروپولیٹن ٹرانسپورٹ کارپوریشن (بی ایم ٹی سی) کی بسوں میں صرف ریاست کے اندر ہی مفت سفر کر سکیں گی ۔
البتہ کے ایس آر ٹی سی کی لگژری اور ایئر کنڈیشنڈ بسوں بشمول راج ہمسا، نان اے سی سلیپر کوچ، آئیراوتی، امباری جیسے بسوں میں میں مفت سفر کی یہ سہولت دستیاب نہیں رہے گی ۔
مفت سفر کی سہولت فراہم کرنے والی بی ایم ٹی سی کی بسوں کو چھوڑ کر کے ایس آر ٹی سی، این دبلیو کے ایس آر ٹی سی، کلیان کے ایس آر ٹی سی جیسے بقیہ سرکاری اداروں کی بسوں میں مردوں کے لئے 50% سیٹیں محفوظ رہیں گی ۔
ریاستی ٹرانسپورٹ کارپوریشن کو اس سفر کا خرچ ادا کرنے کے لئے حکومت کی طرف سے خواتین مسافروں کو شکتی سمارٹ کارڈ مہیا کیے جائیں گے ۔ 'سیوا سندھو' پورٹل کے ذریعہ درخواست دے کر یہ کارڈ حاصل کیے جا سکیں گے ۔ حکومت کی طرف سے کارڈ کی تقسیم کا عمل آئندہ تین مہینوں میں مکمل کیا جائے گا ۔ جب تک کارڈ دستیاب نہیں ہوتے ، تب تک مرکزی یا ریاستی حکومت کی طرف سے جاری کردہ تصویر اور رہائشی پتہ والا شناختی کارڈ مفت سفر کے لئے استعمال کیا جا سکے گا ۔