شاہین باغ معاملہ: وجاہت حبیب اللہ کا سپریم کورٹ میں حلف نامہ، ہمارا مظاہرہ پرُامن ہے، پولیس نے بند کی ہیں سڑکیں
نئی دہلی24فروری (ایس او نیوز/ایجنسی) شاہین باغ معاملہ میں سابق آئی اے ایس اور سابق چیف انفارمیشن کمشنر وجاہت حبیب اللہ نے سڑک بند کرنے پر سپریم کورٹ میں حلف نامہ دائر کیا ہے۔ حبیب اللہ نے شاہین باغ کا دورہ کیا ہے اور اپنا حلف نامہ دائر کیا۔
انہوں نے کہا کہ یہاں مظاہرہ پرُامن ہے،پولیس نے شاہین باغ کے ارد گرد کے پانچ مقامات پر ناکہ بندی کی ہے، اگر انہیں ہٹادیا جائے تو ٹریفک معمول پرآجائے گا۔ انہوں نے مزید کہا کہ پولیس نے غیر ضروری طور پر سڑکوں کو بلاک کیا ہے جس سے لوگوں کو مسائل کا سامنا ہے۔پولیس کی طرف سے تحقیقات کے بعد اسکول وین اور ایمبولینس کو سڑکوں سے گزرنے کی اجازت ہے۔
حبیب اللہ کا کہنا ہے کہ شہریت ترمیمی قانون (CAA)، قومی آبادی رجسٹر (NPR) اور قومی شہری رجسٹر (NRC) کے بارے میں حکومت کو مظاہرین سے بات کرنی چاہئے۔ خیال رہے کہ وجاہت حبیب اللہ سابق آئی اے ایس، سابق چیف انفارمیشن کمشنر اور قومی اقلیتی کمیشن کے سابق صدر ہیں۔ شاہین باغ پر سماعت پیر کو ہے، وجاہت حبیب اللہ نے بھی بھیم آرمی کے رہنما چندر شیکھر آزاد کے ساتھ سپریم کورٹ میں عرضی داخل کی ہے۔
خیال رہے کہ شہریت ترمیمی قانون (CAA) کیخلاف شاہین باغ میں سپریم کورٹ نے سینئر وکیل سنجے ہیگڑے اور سادھنا رام چندرن کو مظاہرین سے بات چیت کے لئے مذاکرات کار مقرر کیا تھا۔ مظاہرین سے بات چیت کرکے شاہین باغ میں راستہ کھلوانے کی کوشش جاری ہے۔
غور طلب ہے کہ شاہین باغ میں شہریت ترمیم قانون کی مخالفت میں جاری مظاہرہ کیخلاف درخواستوں پر سپریم کورٹ میں سماعت ہوئی تھی۔ معاملے پر سماعت کرتے ہوئے سپریم کورٹ نے کہا تھا کہ ہم دھرنے پر کچھ نہیں کہہ رہے ہیں،لیکن سوال یہ ہے کہ یہ دھرنا کہاں ہو رہا ہے۔ سپریم کورٹ نے کہا تھا کہ ہماری فکر اس بات پر ہے کہ یہ مظاہرہ سڑک پر کیا جا رہا ہے، اس کیس یا پھر کسی بھی کیس میں سڑک کو بلاک نہیں کیا جا سکتا ہے۔