کوچی، 8/جون (ایس او نیوز/ایجنسی ) کیرالہ کے ایرناکولم کالج سے ایک عجیب معاملہ سامنے آیا ہے جس میں کہا جارہا ہے کہ  ایک ایس ایف آئی (اسٹوڈنٹ فیڈریشن آف انڈیا) لیڈر نے نقلی مارک شیٹ  کےذریعے کامیابی حاصل کرلی ہے۔کہا جارہا ہے کہ  اس لیڈر نے  امتحان ہی نہیں دیا مگر اسے    پاس کر دیا گیا ہے۔ معاملہ منظر عام پر آتے ہی کیرالہ اسٹوڈینٹ یونین کے طلبہ نے  مہاراجہ کالج کے سامنے احتجاجی مظاہرہ کیا۔

معاملے کو لے کر  کیرالہ کانگریس لیڈر رمیش چنیتھالہ نے سوال کیا کہ ’’ریاست میں یہ کیا ہو رہا ہے۔‘‘ انہوں نے کیرالہ میں بایاں محاذ حکومت کی قیادت کرنے والی کمیونسٹ پارٹی آف انڈیا (مارکسوادی) کو تنقید کا نشانہ بھی بنایا کیونکہ ایس ایف آئی اس پارٹی کی طلبا یونٹ ہے۔

خبر رساں ایجنسی اے این آئی کی رپورٹ کے مطابق ہ ایس ایف آئی کے ریاستی جنرل سکریٹری پی ایم آرشو نے کسی بھی امتحان میں حصہ نہیں لیا تھا، پھر بھی ا سے  پاس کر دیا گیا۔ اس تعلق سے رمیش چنیتھالہ نے  کہا کہ ’’اگر یہ ایس ایف آئی ہے، تو کیرالہ میں وہ بغیر چیلنج کے کالج انتخاب جیت جاتے ہیں، بغیر امتحان دیئے پاس ہو جاتے ہیں اور ملازمتوں کے لیے فرضی ڈگری حاصل کر لیتے ہیں۔انہوں نے پوچھا کہ  کیرالہ  میں آخر کیا ہو رہا ہے؟ انہوں نے کہا کہ  یہ کیرالہ حکومت کی ناکامی کو ظاہر کرتا ہے۔‘‘

واضح رہے کہ منگل کے روز ریاست میں کانگریس کی طلبا یونٹ کے  ایس یو نے الزام لگایا  ہے کہ ایرناکولم کے مہاراجہ کالج نے ایس ایف آئی لیڈر پی ایم آرشو کی مارک شیٹ جاری کی ہے جس میں انھیں پاس دکھایا گیا ہے۔ کے ایس یو نے الزام لگایا کہ آرشو نے ایک بھی امتحان میں حصہ نہیں لیا تھا۔

’ٹائمز ناؤ‘ کی ایک رپورٹ کے مطابق کالج انتظامیہ نے ریزلٹ کو تکنیکی خامی بتاتے ہوئے کہا کہ اس ریزلٹ کو حکومت ہند کے ماتحت آنے والے نیشنل انفارمیٹکس سنٹر (این آئی سی) نے پبلش کیا ہے۔ بہرحال، اس واقعہ کے خلاف کے ایس یو نے بدھ کے روز مہاراجہ کالج کے سامنے مظاہرہ کیا۔ کیرالہ اسٹوڈنٹ یونین نے سابق ایس ایف آئی لیڈر ودیا وجین پر کالج کی نقلی مہر اور لیٹر ہیڈ کا استعمال کر کے ملازمت حاصل کرنے کا الزام بھی عائد کیا ہے۔ اس مظاہرہ میں شامل طلبا پر پولیس نے واٹر کینن کا استعمال کر انھیں منتشر کرنے کی کوشش کی۔