کاروار میں وزیرمویشی پالن کی گئو کشی قانون کی سختی سے پابندی کرنے آفسران کو تاکید۔ خلاف ورزی کرنے پر کڑی کارروائی کرنے کی دی ہدایت
کاروار،19؍جنوری(ایس او نیوز) وزیربرائے مویشی پالن اور حج و اوقاف پربھو چوہان نے ڈپٹی کمشنر دفتر کے ہال میں منعقدہ ایک میٹنگ میں ڈی سی ،ایس پی اور محکمہ مویشی پالن کے افسران سے خطاب کرتے ہوئے کہا کہ گئو کشی پر پابندی کا جو قانون عمل میں آیا ہے، اس کی پابندی سختی کے ساتھ کی جائے۔
انہوں نے سرکاری افسران کو ہدایت دی کہ اس قانون کے تعلق سے عوام کو جانکاری دینے کے لئے گرام سبھا جیسے پروگرام ضلع بھر میں منعقد کیے جائیں۔ اور دیکھا جائے کہ کسی بھی قیمت پر اس قانون کی خلاف ورزی نہ ہو۔ جو بھی اس کی خلاف ورزی کرے گا کہ اس کے لئے 3سے 6سال کی سزا اور 50ہزار سے 5لاکھ روپے کا جرمانہ مقرر ہے۔ اور اگر وہی شخص دوسری باریہ جرم کرتا ہے تو پھر 10لاکھ روپے جرمانہ لگایا جائے گا۔
وزیر موصوف نے بتایا کہ کسی بھی حالت میں کوئی بھی گائے قصائی خانہ تک نہیں پہنچنی چاہیے۔ جانوروں کے ڈاکٹراور گرام پنچایت پی ڈی او کی یہ ذمہ داری ہوگی کہ وہ گئو کشی کے نتیجے میں ملنے والی سزا کے تعلق سے کسانوں کو آگاہ کریں۔اس قانون کے مطابق مویشی کا مطلب گائے، بچھڑا ، بیل اور 13سال سے کم عمر کی بھینس اور بھینسا ہے۔
پربھو چوہان نے افسران کو بتایا کہ مویشیوں کی رفت پر بھی پابندی ہے۔ صرف مویشی پالن اور زرعی کام کے لئے ہی جانور ایک جگہ سے دوسری جگہ منتقل کیے جا سکیں گے۔ اورجب جانوروں کو کسی دوسری جگہ منتقل کرنے کی ضرورت پیش آئے تو جانوروں کے ڈاکٹر کا سرٹفکیٹ، ملکیت کا ثبوت اور اینیمل ٹیاگ کی تحقیق کرنا ضروری ہوگا۔ اس کے علاوہ ایک گاڑی میں پانچ یا چھ سےزیادہ جانور لادے نہیں جا سکیں گے۔ ساتھ ہی ان جانوروں کے لئے پانی اور چارے کا مناسب انتظام کرنا ضروری ہوگا۔ حاملہ جانوروں کو رفت نہیں کیا جا سکے گا۔ اس کے علاوہ رات کے 8 بجے سے صبح 6بجے کے درمیان جانوروں کو ایک جگہ سے دوسری جگہ رفت کرنے کی اجازت نہیں دی جائے۔
وزیر موصوف نے افسران کو یہ بھی ہدایت دی کہ ضلع شمالی کینرا کی گئو شالاوں میں موجود مویشیوں کے لئے چارہ اور ضروری سہولتوں کا پورا انتظام کیا جائے۔ انہوں نے بتایا کہ آئندہ دنوں میں ضلع کے ہرتعلقہ میں دو دو گئو شالائیں قائم کرنے پر غور کیا جا رہا ہے۔ اس کی وجہ سے گئوکشی مخالف قانون کو نتیجہ خیز طریقے پر لاگو کرنے میں مدد ملے گی۔
اس موقع پر ضلع ڈپٹی کمشنر ڈاکٹر ہریش کمار، ضلع ایس پی شیو پرکاش دیوراجو، ایڈیشنل ڈی سی کرشنا مورتی، اسسٹنٹ کمشنر ودیا شری چندرگی اور محکمہ مویشی پالن کے افسران موجود تھے۔