دھارواڑ کے ایک ہی خاندان کے سات افراد ممبئی جانے کے دوران سڑک حادثے میں جاں بحق؛ دو لوگوں کو حج کے سفر پر روانہ کرنے جارہے تھے خاندان کے باقی لوگ
بھٹکل 31/جولائی (ایس او نیوز) قریبی شہر دھارواڑ سے ممبئی جانے کے دوران دھارواڑ کے ایک ہی خاندان کے سات افراد اُس وقت جاں بحق ہوگئے جب ان کی کار مہاراشٹرا کے ستارہ میں ممبئی۔بنگلور نیشنل ہائی وے پر ایک درخت سے ٹکراگئی۔ مرنے والوں میں تین معصوم بچے بھی شامل ہیں۔ حادثے کی شدت کا اندازہ اس بات سے لگایا جاسکتا ہے کہ ٹکر لگتے ہی کار کے پرخچے اُڑ گئے اور کار پر سوار ڈرائیور کو چھوڑ کر سبھی افراد جاں بحق ہوگئے۔
ذرائع سے ملی اطلاع کے مطابق نظام الدین سوداگر اور ان کی اہلیہ صفورہ بیگم دونوں حج کے مبارک سفر پر روانہ ہونے ممبئی جارہے تھے، انہیں ممبئی ائرپورٹ تک چھوڑنے ان کا بیٹا منصوف سوداگر، منصوف کی اہلیہ نفیسہ سوداگر، بچے طیبہ، گُلنار اور احمد بھی کار پر سوار تھے۔ بتایا گیا ہے کہ بدھ کی اولین ساعتوں میں قریب تین بجے ان کی کار بنگلور۔ممبئی نیشنل ہائی وے پر تیز رفتاری کے ساتھ ایک درخت سے ٹکراگئی۔ ذرائع نے بتایا کہ حادثے میں ایک ہی خاندان کے چھ لوگ موقع پر ہی اللہ کو پیارے ہوگئے جبکہ ایک نے اسپتال میں دم توڑ دیا، البتہ ڈرائیور جس کی شناخت شہباز کی حیثیت سے کی گئی ہے، حادثے میں شدید زخمی ہوا ہے اور اُسے قریبی اسپتال میں ابتدائی طبی امداد کے بعد بیلگام اسپتال منتقل کیا گیا ہے جہاں اس کی حالت نازک بتائی گئی ہے۔
ذرائع نے بتایا کہ حادثہ پونے سے تقریبا 140 کلو میٹر دورکاشل نامی دیہات کے نیشنل ہائی پر پیش آیا جو ضلع ستارہ کی حدود میں آتا ہے۔
پولس ذرائع سے ملی اطلاع کے مطابق حادثے کی نوعیت دیکھ کر ایسا لگتا ہے کہ کار کی رفتار بے حد تیز رہی ہوگی جس کے دوران غالباً کسی نامعلوم وجہ سے ڈرائیور کے ہاتھوں سے کار بے قابو ہوگئی اور درخت سے ٹکراگئی۔ پولس ذرائع کے مطابق چھ لوگوں کی موقع پر ہی موت واقع ہوگئی، البتہ ایک کی موت اسپتال پہنچنے کے بعد ہوئی۔
تمام لوگوں کی میت رات قریب 8:30 بجے دھارواڑ اُن کے گھر لائی گئی، رات 9:30 بجے مڈیھال دھارواڑ مسجد میں نماز جنازہ ادا کی جائے گی اور قریبی قبرستان میں تدفین عمل میں آئے گی۔
واقعے کی اطلاع ملتے ہی دھارواڑ میں ان کے گھر پر کافی لوگ جمع ہو گئے، مرحوم نظام الدین صاحب اپنے پیچھے دو بیٹوں اور دو بیٹیوں سمیت کافی رشتہ داروں کو چھوڑ کر اللہ کے دربار میں حاضر ہوگئے۔ اللہ گھروالوں کو صبرجمیل عطا فرمائے اور حادثے میں جاں بحق ہونے والے تمام لوگوں کی مغفرت فرمائے اور اُنہیں جنت الفردوس میں اعلیٰ مقام عطا فرمائے۔ اٰمین۔
خیال رہے کہ دھارواڑ بھٹکل سے قریب 225 کلو میٹر کے فاصلے پر ہے۔