ٹمکور،22؍ستمبر(ایس او نیوز)ضلع کے مختلف ترقیاتی وتعمیر ی کاموں کا افتتاح وسنگ بنیاد رکھنے کی تقریب میں شرکت کیلئے پہلی مرتبہ وزیر اعلیٰ بسوراج بومئی اسی ماہ کی 25تاریخ کو ضلع کا دورہ کریں گے۔اس پروگرام کو کامیاب بنانے کیلئے تمام محکموں کے افسروں کو پوری ذمہ داری کے ساتھ کام کرناہوگا۔یہ ہدایت ڈپٹی کمشنروائی ایس پاٹل نے افسروں کو دی۔انہوں نے یہاں شہر میں واقع ڈپٹی کمشنر دفتر کے میٹنگ ہال میں طلب کردہ تیاریوں کے اجلاس کی صدارت کرتے ہوئے کہاکہ ضلع اسپتال کے احاطے میں 100بستروں کی استطاعت والے ماں بچہ اسپتال،کینسر اسپتال اور دیگر عمارتوں کی تعمیر کیلئے وزیر اعلیٰ بسوراج بومئی سنگ بنیاد رکھیں گے۔اس کے علاوہ مختلف محکموں کی طرف سے شہر میں تعمیری کاموں کا سنگ بنیاد اورمکمل شدہ عمارتوں کا افتتاح بھی وزیر اعلیٰ کے ہاتھوں عمل میں آئے گا۔تمام پروگراموں کو منظم طریقے سے منعقد کرنے اورکامیاب بنانے کیلئے پوری ذمہ داری کے ساتھ کام کیاجائے۔اسی دوران وزیر اعلیٰ کے ہاتھوں مختلف منصوبوں کے تحت مستحقین میں سہولتیں تقسیم کرنے کے بارے میں بھی تبادلہئ خیال کیاگیا۔انہوں نے کہاکہ احتیاطی اقدامات کے طورپر محکمہ صحت کی طرف سے ایمبولنس اور فائر فورس کی طرف سے فائر انجن کا اہتمام کیاجائے۔ڈپٹی کمشنرنے کہاکہ وزیر اعلیٰ کے اس پروگرام میں تمام سرکاری محکموں کے افسروں کو لازمی طور پر شرکت کرنی ہوگا۔کسی بھی صورت میں بہانے بازی برداشت نہیں کی جائے گی۔ضلع پولیس سپرنٹنڈنٹ راہل کمار شاہپورواڈ نے کہاکہ پروگرام میں ڈرون کیمروں کے استعمال کیلئے موقع نہیں رہے گا۔کسی بھی طرح کے ناخوشگوار واقعے کو موقع نہ ملے اس طرح کے حفاظتی انتظاما ت کئے جائیں گے۔اس اجلاس میں اڈیشنل ڈپٹی کمشنرکے چنابسپا،ضلع پنچایت چیف ایگزی کیٹیو آفیسر ڈاکٹر کے ودیاکماری کے علاوہ مختلف محکموں کے آفیسرس موجود تھے۔