بھٹکل حنیف آباد میں سیرت النبیﷺ پر شاندار پروگرام؛ جیسے جیسے تعلیم آرہی ہے ایمان نکل رہا ہے؛ مولانا الیاس جاکٹی ندوی کا خطاب
بھٹکل 10/نومبر (ایس او نیوز) ماہ ربیع الاول کی مناسبت سے بھٹکل کے مختلف علاقوں میں سیرت النبیﷺ کے الگ الگ پروگرام منعقد ہورہے ہیں ، اسی طرح کا ایک پروگرام حنیف آباد میں منعقد ہوا جس میں علی میاں اسلامک اکیڈمی کے بانی و جنرل سکریٹری اور آل انڈیا مسلم پرسنل لاء بورڈ کے رکن مولانا الیاس جاکٹی ندوی نے ولولہ انگیز خطاب کرتے ہوئے کہا کہ قوم و ملت کے بچے جیسے جیسے تعلیم کے میدان میں آگے بڑھ رہے ہیں، اُن کا ایمان کمزور سے کمزور تر ہوتا جارہا ہے۔ مولانا نے یہاں تک کہا کہ حالات اس قدر سنگین ہیں کہ بچوں میں بظاہر تعلیم آگئی ہے لیکن ایمان کمزور ہی نہیں بلکہ ایمان نکل رہا ہے۔ مولانا نے کہا کہ دینی لحاظ سے جب تک ہمارے بچوں کی بنیاد مضبوط نہیں ہوگی ، اُس وقت تک وہ قوم کی صحیح قیادت نہیں کر سکیں گے۔ ایمان کی مضبوطی، نماز کی پابندی اور بچوں کی تربیت یہ تین چیزیں ایسی ہیں ، اگر اُمت اس پر واپس آجاتی ہے تو اُمت کا 99 فیصد مسئلہ حل ہوجائے گا۔ مولانا نے بچوں کے بگاڑ کے لئے ماں کی تربیت نہ ہونے کو ذمہ دارٹہرایا انہوں نے کہا کہ والدین خود موبائل لے کر بیٹھیں گے اور رات کو دو دو بجے سوئیں گے اور چاہیں گے کہ بچے موبائل نہ کھیلیں اور جلدی سوجائیں، یہ ممکن نہیں ہے۔ آپ خود جلد سونے کی عادت ڈالئے، آپ خود موبائل لے کر کھیلنا بند کردیجئے۔بچے خود آپ کی اقتداء کریں گے۔ مولانا نے والدین پر زور دیا کہ وہ اپنے بچوں کی تربیت میں ہرگز کوتاہی نہ کریں، اُن کی صحیح نگرانی کریں، عشاء کی نماز کے فوری بعد اُنہیں آرام کرنے کا پابند بنائیں اور صبح کی نماز میں اُٹھانا معمول بنائیں۔
حنیف ویلفیر اسوسی ایشن کے زیراہتمام سیرت النبی کے اس پروگرام میں علاقہ کی پانچ مساجد،مسجد عمیر، مسجد طلحہ، مسجد فاطمہ، مسجد منیری اور مسجد ابوبکر صدیق کے شبینہ مکاتب کے طلباء کے درمیان مسنون دعاؤوں اور کوئز کا دلچسپ مقابلہ ہوا ، اسی طرح اپنے حدود کے عالم، فاضل سمیت پی یو سی، ایس ایس ایل سی وغیرہ میں نمایاں کامیابی حاصل کرنے پر طلباء وطالبات کو تعلیمی ایوارڈ سے نوازا گیا۔
احمدخضیمہ ہلارے کی تلاوت کلام پاک سے جلسہ کا آغازہوا، طریف ابو حُسینا نے نعت پاک کا نذرانہ پیش کیا، حنیف ویلفیر اسوسی ایشن کے جنرل سکریٹری مولوی احمدایاد ایس ایم ندوی نے مہمانان و حاضرین کا استقبال کرتے ہوئے پروگرام کی غرض و غایت پر روشنی ڈالی۔ابراہیم ماعز ایم جے اور ساتھیوں نے حنیف ویلفیر کا ترانہ پیش کیا۔مولوی ابوالحسن ایس ایم نے پروگرام کی نظامت کی۔حنیف ویلفیر اسوسی ایشن کے صدر نثار احمد رکن الدین نے پروگرام کی صدارت کرنے کے ساتھ ساتھ آخر میں کلمہ تشکر پیش کیا۔کوئیز مقابلہ اور دُعا کے سیشن کی نظامت مولوی عدنان قاضی ندوی، مولوی حسن موٹیا اور مولانا ناصر شیخ ندوی نے کی۔
اسٹیج پر قومی سماجی ادارہ مجلس اصلاح و تنظیم کے صدر جناب ایس ایم سید احمد پرویز ، جنرل سکریٹری عبدالرقیب ایم جے ندوی اور بھٹکل مسلم یوتھ فیڈریشن کے سابق صدر مولانا انصار خطیب مدنی سمیت علاقہ کے ذمہ داران فیصل پیشمام، عبدالجلیل ایس ایم، سید علی مالکی و دیگر کافی ذمہ داران موجود تھے۔
