بنگلورو۔22/مئی(ایس او  نیوز) لوک سبھا انتخابات کے لئے شہر میں ووٹوں کی گنتی کے تمام انتظامات پورے کرلئے گئے ہیں۔ بنگلور کے ریٹرننگ افسر اور بی بی ایم پی کمشنر منجوناتھ پرساد اور پولیس کمشنر سنیل کمار نے آج تینوں مقامات پر گنتی کے مرکزوں میں سکیورٹی کے انتظامات کا معائنہ کرتے ہوئے اطمینان ظاہر کیا۔

اخباری نمائندوں سے بات چیت کرتے ہوئے منجوناتھ پرساد نے بتایاکہ بنگلور سنٹرل حلقے کے ووٹ ماؤنٹ کارمل کالج، بنگلو ر نارتھ کے ووٹ سینٹ جوزف انڈین ہائی اسکول اور بنگلور ساؤتھ کے ووٹ ایس ایس ایم آر وی کالج میں گنے جائیں گے۔ گنتی کے مراکز کے اطراف 100 میٹر کے دائرے میں کسی بھی گاڑی کا داخلہ ممنوع ہے۔ گنتی کے مراکز میں کاؤٹنگ ایجنٹوں اور امیدواروں کو شناختی کارڈ کے بغیر داخلہ نہیں دیا جائے گا۔ موبائل فون استعمال کرنے کی اجازت امیدواروں کو بھی نہیں ہوگی۔ گنتی کے ہرمرکز کے پاس فائرفورس کی گاڑی، دو ایمبولنس اور جنرریٹر مہیا کروائے گئے ہیں۔ گنتی کے عملے سے کہاگیا ہے کہ وہ صبح پانچ بجے وہ اپنے ڈیوٹی پر حاضر ہوجائیں، آٹھ بجے پوسٹل ووٹوں کی گنتی شروع ہوگی اور ساڑھے آٹھ بجے الیکٹرانک ووٹنگ مشینوں میں ڈالے گئے ووٹوں کی گنتی شروع کی جائے گی۔ یہ اندازہ لگایا جارہا ہے کہ دوپہر بارہ بجے تک واضح رجحانات ظاہر ہوسکتے ہیں۔

گنتی کے آخری مرحلے میں ہر اسمبلی حلقے کے پانچ پانچ پولنگ بوتھوں کے ووٹوں کو وی وی پیاٹ کی پرچیوں سے ملایا جائے گا اور گنتی کا عمل شام پانچ سے چھ بجے تک پورا ہونے کی توقع ہے۔ پولیس انتظامات کے تعلق سے شہر کے پولیس کمشنر سنیل کمار نے بتایاکہ گنتی کے ہر مرکز پر بندوبست کے لئے دوہزار جوانوں کو تعینات کیا گیا ہے۔ ہر مرکز پر نیم فوجی دستوں کی دو کمپنیاں، کے ایس آر پی کی 23کمپنیاں تعینات رہیں گی۔ حفاظتی انتظامات کی نگرانی کے لئے سات ڈی سی پی، 22اے سی پی، 77 انسپکٹرس، 140 سب انسپکٹر، اور دوہزار پولیس جوان متعین رہیں گے۔ہر گنتی کے مرکز کے سو میٹر کے اطراف سرحد بنائی گئی ہے، جس کے اندر کسی کا داخلہ منع ہے۔ میڈیا کے نمائندوں کے لئے صرف میڈیا روم تک ہی محدود رہے گا۔انہوں نے بتایاکہ کل گنتی کے پیش نظر صبح چھ سے رات بارہ بجے تک شہر بھر میں دفعہ 144کے تحت امتناعی احکامات لاگو رہیں گے۔ اس کے علاوہ شہر بھر میں شراب کی فروخت پر بھی پابندی عائد ہے۔