بھٹکل میں کل 5 اگست کو 144 نافذ؛ ایودھیا میں رام مندر’شیلا نیاس اور بھومی پوجا‘کے پس منظر میں ریاست کے مختلف علاقوں میں احتیاطی اقدامات
بھٹکل 4/اگست (ایس او نیوز) یوپی کے ایودھیا میں 5اگست کو رام مندر کی تعمیر کے لئے ’شیلانیاس اور بھومی پوجا‘کی رسم اداکی جارہی ہے۔ اس پس منظر میں امن وامان اور شانتی بنائے رکھنے کے لئے بھٹکل تعلقہ میں تحصیلدار کی جانب سے دفعہ 144کے تحت 5اگست کی صبح 6بجے سے رات 8بجے تک امتناعی احکامات لاگو کرنے کا اعلان کیا گیا ہے۔
تحصیلدار کی جانب سے جاری کیے گئے سرکیولر میں کہا گیا ہے کہ کل ہندو کارکنان اور تنظیموں کی جانب سے رام مندر شیلانیاس کا جشن منانے اور جلسے کرنے اور جلوس نکالنے کے امکانات موجودہیں۔ دوسری طرف سوشیل ڈیموکریٹک پارٹی کی جانب سے کل شام 4.30بجے بھٹکل تحصیلدار دفتر کے باہر کشمیر میں انسانی حقوق کی خلاف ورزی اور تین طلاق کو قابل سزاجرم بنائے جانے کے خلاف ایک احتجاجی دھرنا دینے کا منصوبہ بنایا گیا ہے۔ان حالات کو دیکھتے ہوئے بھٹکل جیسے مذہبی اور سیاسی طور پر حساس علاقے میں کل کسی بھی طرح کی بدامنی روکنے اور امن و امان بنائے رکھنے کے لئے امتناعی احکامات نافذ کیے گئے ہیں۔
بھٹکل تحصیلدارایس روی چندرا کی طرف سے جاری کیے گئے اس حکم نامے کی محکمہ پولیس کی جانب سے تعمیل کی جائے گی۔ جس کے مطابق کل بھٹکل تعلقہ حدود میں کسی بھی عوامی تقریب منعقد کرنے، ریالیاں نکالنے اورعوامی مقامات پرپٹاخے پھوڑنے،کسی شخص یا مقام کے پتلے جلانے،خطابات کرنے، بھجن پروگرام منعقد کرنے اور جشن منانے پرپابندی لاگو رہے گی۔ اس کے علاوہ چار سے زیادہ افراد ایک جگہ جمع ہونے اور کسی بھی قسم کا ہتھیار، دھماکہ خیز مادہ اپنے ساتھ لے کر باہر نکلنے پر قانونی کارروائی کی جائے گی۔
تحصیلدار نے اپنے حکم نامے میں واضح کیا ہے کہ جن لوگوں نے تعلقہ انتظامیہ سے اجازت لے کر شادی کی تقریب طئے کی ہے یا کسی فوت ہونے والے شخص کی آخری رسومات یا پھر سرکاری پروگرام میں شریک ہونا ہے تو پھر اُن پر امتناعی حکم کا اطلاق نہیں ہوگا۔