دبئی سے بھٹکل و اطراف کے 181 لوگوں کو لے کر آج آرہی ہے دوسری چارٹرڈ فلائٹ؛ رات کو مینگلور ائرپورٹ میں ہوگی لینڈنگ
بھٹکل 7جولائی (ایس او نیوز) کورونا وباء اور اس کے بعد ہوئے لاک ڈاون سے دبئی اور امارات میں پھنسے ہوئے 181 لوگوں کو لے کر آج دبئی سے دوسری چارٹرڈ فلائٹ مینگلور پہنچ رہی ہے۔ اس بات کی اطلاع بھٹکل کے معروف تاجر اورقومی سماجی ادارہ مجلس اصلاح و تنظیم کے نائب صدر جناب عتیق الرحمن مُنیری نے دی۔
انہوں نے بتایا کہ شام سات بجے عرب امارات کے راس الخیمہ ائرپورٹ سے اسپائس جیٹ مینگلور کے لئے اُڑان بھرے گی۔ رات قریب ایک بجےفلائٹ کی مینگلور ائرپورٹ میں لینڈنگ ہوگی، دبئی سے راس الخیمہ ائرپورٹ پہنچنے کے لئے مسافروں کو دبئی سے خصوصی بسوں کا انتظام کیا گیا ہے ۔
مینگلور میں حسب سابق بھٹکلی جماعت المسلمین مینگلور کی جانب سے تمام مسافروں کا استقبال ہوگا، رات کی ضیافت کے بعد جماعت کے ارکان مسافروں کو پانچ بسوں پر بٹھاکر بھٹکل روانہ کریں گے۔جہاں تنظیم کے زیرانتظام فیملیس کے لئے ایک پرائیویٹ ہوٹل میں کورنٹائن کا انتطام کیا گیا ہے تو وہیں اس بار جامعہ آباد روڈ پر واقع علی پبلک اسکول میں لوگوں کو الگ تھلگ رکھنے کا خصوصی بندوبست کیا گیا ہے۔
فلائٹ میں 175 سیٹیں ہیں، جبکہ 6 چھوٹے بچے بھی مسافروں کے ساتھ ہوں گے، اس طرح جملہ 181 مسافر بھٹکل کے لئے روانہ ہوں گے۔ جناب عتیق الرحمن مُنیری نے بتایا کہ فلائٹ میں زیادہ تر حاملہ خواتین اور بڑے بزرگ ہیں، ساتھ ساتھ ایسے لوگوں کو بھی موقع دیا گیا ہے جن کی نوکریاں چلی جانے سے لوگ دبئی میں پریشان حال تھے۔
یاد رہے کہ دبئی اور امارات میں کورونا لاک ڈاون میں پھنسے بھٹکل اور اطراف کے لوگوں کی پریشانیوں کو دیکھتے ہوئے اُنہیں راحت دینے کے مقصد سے دبئی میں بھٹکل کے معروف تاجر جناب عتیق الرحمن مُنیری نے لوگوں کو چارٹرڈ فلائٹ کے ذریعے واپس بھٹکل روانہ کرنے کا منصوبہ بنایا تھا جس کے تحت پہلی فلائٹ 12 جون کو روانہ ہوئی تھی، لیکن پہلی فلائٹ کے بعد بھی سینکڑوں دوسرے لوگوں نے اپنی مشکلات اور پریشانیوں کا تذکرہ کرنا شروع کیا اور تعاون کی درخواست کی جس کو دیکھتے ہوئے عتیق الرحمن مُنیری صاحب نے مزید دوسری چارٹرڈ فلائٹ کا منصوبہ بنایا، یہ فلائٹ 23 جون کو روانہ ہونے والی تھی مگر انڈیا میں فلائٹ کو اُتارنے کی اجازت عین وقت پر رد کردی گئی تھی، پھراگلی تاریخ 27 جون پھر 4 جولائی کو بھی طئے کی گئی تھی، لیکن تاریخ منسوخ ہوتے ہوتے آج حتمی طور پر 7جولائی کو فلائٹ مینگلور ائرپورٹ پر اُتارنے کی اجازت دی گئی ہے۔
جناب عتیق الرحمن مُنیری نے بتایا کہ اس فلائٹ میں ضلع اُترکنڑا کے لوگوں کو زیادہ ترجیح دی گئی ہے، اور بھٹکل سمیت مرڈیشور،منکی، ہوناور، سڑلگی اورسرسی وغیرہ کے لوگ بھی شامل ہیں۔ مُنیری نے بتایا کہ اس مرتبہ حکومت ہند کی طرف سے بار بار تاریخ منسوخ کئے جانے سے بہت زیادہ دشواریوں کا سامنا کرنا پڑا، لیکن پرانے ساتھیوں نے اس بار بھی اپنا بھرپور تعاون پیش کیا، انہوں نے بالخصوص قائد قوم جناب ایس ایم سید خلیل الرحمن صاحب کا شکریہ ادا کیا جن کی سرپرستی انہیں حاصل ہے، ساتھ ساتھ منکی جماعت دبئی کے صدر جناب ابومحمد مختصر، بھٹکل مسلم جماعت دبئی کے سابق جنرل سکریٹری رحمت اللہ راہی،دیگر سرگرم ارکان شہریار خطیب، یاسر قاسمجی، جیلانی محتشم، آفاق نائطے، طٰحہ معلم، فہیم رضا، سفیان ایس ایم، معاذ شاہ بندری سمیت بہت سارے دیگر لوگوں کا بھی شکریہ ادا کیا۔ مُنیری صاحب نے اُمید ظاہر کی کہ اس سے قبل پہلی فلائٹ کی روانگی کے موقع پر بھٹکل میں تنظیم کے کارکنوں نے جس سرگرمی کے ساتھ خدمات انجام دی تھی اور لوگوں کو بھٹکل میں کورنٹائن کرانے سمیت دیگر انتظامات انجام دئے تھے، اس بار بھی دبئی کےتمام مسافروں کو سہولتیں فراہم کی جائیں گی۔