یو اے ای میں پھنسے ہوئے 178کرناٹکا واسیوں کو لے کر منگلورو ایئر پورٹ پر اتر ا دوسرا طیارہ
منگلورو، 19؍مئی (ایس او نیوز) یواے ای میں پھنسے ہوئے کرناٹکا واسیوں کو لے کر کل 18؍مئی کی شام کو 7:55بجے منگلورو انٹرنیشنل ایئر پورٹ پر دوسری مرتبہ طیارہ اترا جس میں 178مسافر سوار تھے جن میں 35حاملہ خواتین بھی شامل تھیں۔
ایئر انڈیا ایکسپریس طیارے کے ذریعے دبئی سے آنے والے مسافر جب منگلورو ایئر پورٹ پر اترے تو انہیں کرنسی ایکسچینج، سم کارڈ کی سہولت، طبی کٹ، ناشتہ وغیرہ کی تقسیم کی گئی۔ پھران کی طبی جانچ کے بعدہاتھوں پر کوارنٹین کی سیل لگاتے ہوئے امیگریشن اور دوسری کارروائیاں کرنے کا موقع دیا گیا۔
یاد رہے کہ 12؍مئی کو پہلا طیارہ آیا تھا اس میں جملہ 179مسافر سوار تھے۔اس وقت ایئر پورٹ پر کیے گئے انتظامات میں بڑی بدنظمی کی شکایات موصول ہوئی تھیں۔اور ضلع انتظامیہ کی طرف سے مناسب سہولتیں فراہم نہ کیے جانے پر سوالات اٹھائے گئے تھے۔ لہٰذا ضلع انتظامیہ نے اس مرتبہ زیادہ چستی کے ساتھ انتظامات کیے تھے اور تمام ممکنہ احتیاطی تدابیر کی گئی تھیں۔
اب دوسرے مرحلے میں منگلورو پہنچنے والے مسافروں میں 75جنوبی کینرا، 63اڈپی، 25بنگلورو، 8کوڈاگو اور ضلع شمالی کینرا کے 2مسافر شامل ہیں۔ان میں سے صرف جنوبی کینرا والوں کو منگلورو میں اور بقیہ افراد کو ان کے اپنے اضلاع میں کوارنٹین کے لئے بھیج دیا گیا ہے۔