اقلیتوں اور دلتوں پر ہورہے ظلم و ستم کے خلاف ایس ڈی پی آئی کا احتجاجی مظاہرہ
منگلورو30/جون (ایس او نیوز) سوشیل ڈیموکریٹک پارٹی آف انڈیا نے ملک کے مختلف شہروں میں دلتوں اور اقلیتوں پر ہورہے ظلمن وستم کی مذمت کرتے ہوئے جنوبی کینرا ڈپٹی کمشنر کے دفتر کے سامنے ایک احتجاجی مظاہرہ منعقد کیا۔
مظاہرین سے خطاب کرتے ہوئے ایس ڈی پی آئی کے ضلع سیکریٹری اقبال بیلارے نے کہا کہ نریندرا مودی ایک منتخب وزیر اعظم کی طرح نہیں بلکہ ہٹلر جیسے ڈکٹیٹر کی صورت میں ملک پر حکومت کررہے ہیں۔جبکہ دوسری طرف کانگریس اور جنتادل ایس کی مشترکہ ریاستی حکومت گؤ رکھشا اور سری رام کے نام پر ہونے والے ظلم وستم کو دیکھ کر بھی ان دیکھی کررہی ہے۔پورے ضلع میں پولیس افسران دوہرا معیار اپنائے ہوئے ہیں۔
انہوں نے مزید کہا کہ بیلتنگڈی میں جانوروں کو غیر قانونی طور پر ٹرانسپورٹ کرنے کے معاملے میں وہاں کے ایم ایل اے نے جو اشتعال انگیز بیان دیا ہے(ایم ایل اے اجیت پونجا نے کہا تھا کہ گائیں لے جانے والے اپنے ساتھ جو تلواریں رکھتے ہیں انہیں تلواروں سے ان لوگوں کو قتل کردیں)وہ سماج میں بدامنی پھیلانے کا سبب ہوسکتا ہے، اس لئے ایم ایل اے کے خلاف دفعہ 153(1)کے تحت مقدمہ دائر کیا جانا چاہیے۔
پی ایف آئی کے ضلع صدر حنیف کاٹی پلّا نے کہا کہ سری رام ایک تاریخی اور قابل تقلید شخصیت کا نام ہے، لیکن منووادی اور انسانیت کی دشمن ذہنیت والے سنگھ پریوار کے لوگ سری رام کا نام اپنے نیچ کاموں کے لئے استعمال کرتے ہیں۔اصلی ہندوؤں کو یہ بات صحیح طور پر سمجھ لینی چاہیے۔احتجاجی جلسے کی صدارت ایس ڈی پی آئی کے ضلع صدر عطاء اللہ جوکٹّے نے کی۔ ایس ڈی پی آئی کے ریاستی لیڈروں نے بھی اس موقع پر خطاب کیا۔
مظاہرے کے دوران ایس ڈی پی آئی کے لیڈر ایاز کرشنا پور، عبدالجلیل کرشناپور، اینتھونی پی ڈی، آنند میتے بیل، راکیش، شاہول ایس ایچ، نوراللہ کولائی، ذاکر حسین الال، اسماعیل شافی وغیرہ موجود تھے۔
