بھٹکل کے نوجوان پر فوریسٹ افسران کا جان لیوا ٹارچر : ایس ڈی پی آئی کی طرف سے خاطی افسران کو معطل کرنے کا مطالبہ؛ ڈی سی کو میمورنڈم
بھٹکل:28؍مارچ (ایس او نیوز) سوشیل ڈیموکریٹک پارٹی آف انڈیا نے بھٹکل اسسٹنٹ کمشنر کی معرفت ضلع کے ڈپٹی کمشنر کے نام میمورنڈم پیش کرتے ہوئے اس بات کا مطالبہ کیا ہے کہ بھٹکل کے جن دو نوجوانوں پر جھوٹا الزام عائد کرتے ہوئے محکمہ جنگلات کے آفیسران نے ظلم ڈھایا ہے اُن آفسران سمیت میڈیکل آفیسر کے خلاف سخت قانونی کارروائی کی جائے۔
ڈی سی کے نام دئیے گئے میمورنڈم میں ایس ڈی پی آئی نے کہاہےکہ عمیر سید رکن الدین بھٹکل تعلقہ کوپا دیہات کے بیٹکور میں اپنے دوست کے گھر پک نک منانےکے بعد شہر لوٹ رہاتھا تو فاریسٹ آفیسران نے جھوٹے الزا م میں گرفتار کرنے کے بعدا سپر جان لیوا اوردہشت بھرا حملہ کیا ہے، اسے ٹارچر کیاہے۔ پیشانی پر بندوق رکھ کر جان سے مارڈالنے کی دھمکی دے کر غلطی نامہ پر دستخط لیا ہے۔ اس کے بعد تعلقہ میڈیکل آفیسر نے بھی عمیر کی صحت کی جانچ کرنے کے بعد ’ٖفٹ‘ ہونے کا جھوٹا سرٹیکفٹ دے کر محکمہ جنگلات کا تعاون کیا ہے۔
میمورنڈم میں لکھا گیا ہے کہ عمیر رکن الدین کے جسم پر محکمہ جنگلات کے افسران کی طرف سے ڈھائے گئے ظلم کے نشان موجود تھے، سوجن بھی آئی تھی ، چلنے پھرنے کی سکت نہیں تھی ، ایسے خراب حالات میں بھی ڈاکٹر نے صحت مند ہونےکی رپورٹ دے کر معصوم پر ظلم کیا ہے۔ ان حالات کو سامنے رکھتے ہوئے ایس ڈی پی آئی نے واقعے کی سخت مذمت کرتے ہوئے ضلع ڈپٹی کمشنر سے اپیل کی ہے کہ اس معاملے میں ظلم ڈھانے والے فاریسٹ افسران کے ساتھ ساتھ میڈیکل آفیسر پر سخت قانونی کارروائی کی جائے اور انہیں فوری طور پر معطل کیا جائے ۔ ایس ڈی پی آئی نے عمیر رکن الدین پر لگائے گئے الزامات کو ردکرنےکی بھی پرزور مانگ کی ہے۔ اس موقع پر ایس ڈی پی آئی کے اترکنڑا ضلع صدر توفیق بیری، عبدالکریم، عبدالعظیم وسیم وغیرہ و دیگر کافی ممبران موجود تھے۔