منگلورو 25 / جون (ایس او نیوز) شہر کے مضافات پڈیل آلپے کے قریب الیکٹرک اسکوٹر کے شو روم میں اچانک آگ بھڑک اُٹھنے سے  30 سے زائد اسکوٹر خاک ہوگئے جس سے لاکھوں روپے کا نقصان ہوا ہے ۔

 جمعہ  صبح 8 بجے کے قریب شو روم سے بھاری مقدار میں دھواں نکلنا شروع  ہوا جس سے آتشزدگی کا پتہ چلا ۔  اوپری منزلے پر رہنے والے شوروم کے مالک عبدالحمید کے مطابق دھواں نکلتا دیکھ کر گھر والے نیچے آ گئے اور مقامی لوگوں کی مدد سے آگ بجھانے کی کوشش شروع کی اور پھر فائر بریگیڈ نے اس پر قابو پالیا ۔

    بتایا جاتا ہے کہ  آگ لگنے سے شوروم کے اندر موجود 34 اسکوٹر جزوی طور پر جل گئے جبکہ 4 اسکوٹر پوری طرح خاکستر ہوگئے ہیں ۔ اس کے علاوہ فاضل پرزے ، بیٹریاں اور دوسرا سازوسامان جلنے سے لاکھوں روپے کا نقصان ہوا ہے ۔

  جائے وقوع پر پہنچنے والے فائر بریگیڈ عملہ نے بتایا کہ شارٹ سرکیوٹ کی وجہ سے یہ آگ بھڑکی تھی ۔     اس سلسلے میں کنکن ناڈی پولیس اسٹیشن میں کیس درج کیا گیا ہے ۔