کورونا کیس بڑھتے رہے تو اسکول بند کرنا ناگزیر:وزیر اعلیٰ ایڈی یورپا
بنگلورو،22؍مارچ(ایس او نیوز)وزیر اعلیٰ بی ایس ایڈی یورپا نے کہا ہے کہ کرناٹک میں کورونا وائرس کی صورتحال میں اگر بگاڑ کا سلسلہ جاری رہا تو ممکن ہے کہ اسکولوں اور کالجوں کو بند کرنے کے احکامات صادر کردئیے جائیں۔
ٹمکورمیں اخباری نمائندوں سے بات کرتے ہوئے انہوں نے کہا کہ فی الحال اسکولوں اور کالجوں کو بند کرنے کی کوئی تجویز حکومت کے زیر غور نہیں۔انہوں نے کہا کہ ایک ہفتہ تک صورتحال کا اسی طرح سے جائزہ لیا جائے گا اور اگر اس میں کوئی سدھار نہ آیا اورمتاثرین کی تعداد میں اضافہ جاری رہا تو حکومت کو اپنا فیصلہ لینا پڑسکتا ہے۔ انہوں نے کہا کہ انڈورپروگراموں کے لئے حکومت کی طرف سے پابندیاں لگائی گئی ہیں۔
انہوں نے کہاکہ عوامی پروگراموں پر اب تک کوئی پابندی نہیں لگائی گئی ہے۔ انہوں نے سابق وزیر اعلیٰ سدارامیا کے اس الزام پر کہ کورونا سے نپٹنے کے لئے جاری کی گئی رقم کا غلط استعمال کیا گیا ہے سخت برہمی کا اظہار کیااور کہا کہ بغیر کسی ثبوت کے اپوزیشن لیڈر کو اس طرح کے بیانات دینا زیب نہیں دیتا۔
انہوں نے کہا کہ کووِڈ پر حکومت کی طرف سے جو فنڈس خرچ کئے گئے، اس کا پورا حساب کتاب اسمبلی میں پیش کیا گیا ہے۔ انہوں نے اس موقع پر عوام سے اپیل کی ہے کہ ماسک کا پابندی سے استعمال کریں، سماجی فاصلہ کو برقرار رکھیں۔