بھٹکل سمیت اُترکنڑا کے ساحلی تعلقوں میں کل سنیچر کو اسکولوں اور کالجوں میں چھٹی؛ بھاری بارش کے امکانات کو دیکھتے ہوئے ضلعی انتظامیہ کا اعلان
بھٹکل 25/اکتوبر(ایس او نیوز) اگلے چوبیس گھنٹوں میں ساحلی علاقوں میں بھاری بارش کے امکانات کو دیکھتے ہوئے ضلعی انتظامیہ نے ضلع اُترکنڑا کے تمام ساحلی تعلقہ جات میں کل سنیچر کو اسکولوں اور کالجوں میں چھٹی کا اعلان کیا ہے۔
گذشتہ چار دنوں سے ضلع بھر میں بارش ہورہی ہے، مگر محکمہ موسمیات نے اگلے چوبیس گھنٹوں میں طوفانی ہواوں کے ساتھ بھاری بارش کا امکان ظاہر کیا ہے جس کو دیکھتے ہوئے ڈپٹی کمشنر ڈاکٹر ہریش کمار نے محکمہ تعلیمات کو اسکولوں اورکالجوں میں چھٹی کا اعلان کرنے کی ہدایت دی ہے، ڈی سی کی ہدایت پر عمل کرتے ہوئے کاروار تعلیمی ضلع کے ڈی ڈی پی آئی این جی نائک نے ساحلی تعلقہ جات کے تمام بلاک ایجوکیشن آفسروں کو ہدایت جاری کی ہے کہ وہ تمام اسکولوں اور کالجوں کو بند رکھنے کی ہدایت جاری کریں۔ ڈی ڈی پی آئی نے اس بات کی بھی ہدایت جاری کی ہے کہ سنیچر کے کلاسس کسی دوسرے دن لئے جائیں۔
اُدھر اُڈپی اور دکشن کنڑا میں آج جمعہ کو اسکولوں اور کالجوں میں چھٹی کا اعلان کیا گیا تھا جس کے بعد آج وہاں تمام تعلیمی ادارے بند تھے۔