کل پیر کو بھارت بند کے موقع پر بھٹکل سمیت ضلع اُترکنڑا کے سبھی اسکولوں اور کالجوں میں چھٹی کا اعلان؛ دکشن کنڑا اور اُڈپی میں بھی ہوگا مکمل بند
بھٹکل 9/ ستمبر (ایس او نیوز)کل پیر کو بھارت بند کے موقع پر بھٹکل سمیت ضلع اُترکنڑا کے سبھی اسکولوں اور کالجوں میں چھٹی کا اعلان کیا گیا ہے۔ اس کے ساتھ ہی مہنگائی کے خلاف کانگریس کی طرف سے کل ہورہے بھارت بند کو دیکھتے ہوئے پوری ریاست کرناٹک میں بند کا زبردست اثر نظر آنے کے امکانات ہیں۔
ریاست بھر کے مختلف اضلاع میں حفاظتی اقدامات کے طور پر متعلقہ ڈپٹی کمشنروں کی طرف سے اسکول اور کالجس بند رکھنے کا اعلان پہلے ہی کیا گیا تھا، شام ہونے تک ضلع اُتر کنڑا کے ڈپٹی کمشنر ایس ایس نکول نے بھی ضلع بھر کے اسکولوں اور کالجوں میں چھٹی کا اعلان کردیا ہے۔
ڈپٹی کمشنر ایس ایس نکول کی جانب سے جاری کردہ اعلان کے مطابق حفاظتی اقدامات کے طور پر کل پیر کو ضلع اُترکنڑا کے سبھی اسکول اور کالجس بند رہیں گے، البتہ تمام سرکاری ادارے کھلے رہیں گے۔
بھٹکل کا سب سے بڑا تعلیمی ادارہ انجمن حامئی مسلمین بھٹکل کے جنرل سکریٹری جناب صدیق اسماعیل نے بھی واضح کیا ہے کہ ڈپٹی کمشنر کی ہدایت کے بعد کل پیر کو انجمن کے سبھی ادارے بشمول اسکول اور کالجس بند رہیں گے۔
اُدھر اُڈپی اور ضلع دکشن کنڑا کے ڈپٹی کمشنروں کی طرف سے پہلے ہی تعلیمی اداروں میں چھٹی کا اعلان کیا جاچکا ہے، جبکہ ریاست کے مختلف اضلاع میں بھی کل اسکولوں اور کالجوں میں چھٹی کا اعلان کیا گیا ہے۔
خیال رہے کہ پٹرول اور ڈیزل کی قیمتوں میں بڑھتے اضافہ کو دیکھتے ہوئے کانگریس نے کل بھارت بند منانے کا اعلان کیا تھا، جس کی کئی دیگر سیاسی پارٹیوں سمیت کئی ایک سماجی اداروں نے بھی حمایت کا اعلان کیا ہے۔