نئی دہلی،18/جون (ایس او نیوز/آئی این ایس انڈیا) گجرات میں راجیہ سبھا انتخابات کو لے کر کانگریس کی درخواست پر سپریم کورٹ سماعت کے لئے تیار ہے۔اس معاملے پر بدھ کو سماعت ہوگی۔گجرات کانگریس کے اپوزیشن لیڈر پریش بھائی دھنانی نے سپریم کورٹ میں عرضی داخل کرکے دو سیٹوں کے لئے جاری الیکشن کمیشن کے نوٹیفکیشن کو چیلنج کیا ہے۔ان کے ذریعہ امت شاہ اور اسمرتی ایرانی کے ذریعہ خالی کی گئی سیٹوں پر ایک ساتھ انتخابات کرانے کی مانگ کی گئی ہے۔درخواست میں کہا گیا ہے کہ ایک ہی دن دونوں سیٹوں پر مختلف انتخابات کرانا غیر آئینی اور آئین کی روح کے خلاف ہے۔گجرات سے راجیہ سبھا میں خالی ہوئی دو سیٹوں پر بھی 5 جولائی کو انتخابات ہوں گے۔ دراصل الیکشن کمیشن کے نوٹیفکیشن کے مطابق امت شاہ کو لوک سبھا انتخابات جیتنے کی سرٹیفکیٹ 23 مئی کو ہی مل گئی تھی  جبکہ اسمرتی ایرانی کو 24 مئی کو ملی۔اس سے دونوں کے انتخابات میں ایک دن کا فرق ہو گیا۔اسی بنیاد پر کمیشن نے ریاست کی دونوں سیٹوں کو الگ الگ سمجھا ہے، لیکن انتخابات ایک ہی دن ہوں گے۔ایسا ہونے سے اب دونوں سیٹوں پر بی جے پی کو فتح مل جائے گی۔کیونکہ وہاں پہلی ترجیح ووٹ نئے طریقے سے ہوں گے۔لیکن ایک ساتھ الیکشن ہوتے تو کانگریس کو ایک نشست مل جاتی۔