دمام سے لوٹ کر مینگلور میں کورنٹائن اُترکنڑا کے مسافر آج پہنچ گئے بھٹکل؛ مینگلور میں کورونا ٹیسٹ نہ لئے جانے پر اُٹھائےسوال
بھٹکل 25جولائی (ایس او نیوز) گذشتہ ہفتہ 18 جولائی کو جو 174 مسافر دمام(سعودی عربیہ) سے مینگلور پہنچے تھے، اُس میں سے سات دنوں کا کورنٹائن مکمل کرکے اُترکنڑا کے قریب 75 مسافر آج بھٹکل پہنچ گئے، مگر مسافروں نے شکایت کی ہے کہ مینگلور میں ان کا کورونا ٹیسٹ نہیں لیا گیا ہے اور ٹیسٹ لئے بغیر ہی انہیں بھٹکل میں مزید سات دنوں کے کورنٹائن پر بھیج دیا گیا ہے۔
بھٹکل کے ایک مسافر نے بتایا کہ جب ہم مینگلور ہوٹل میں کورنٹائن پر تھے تو مینگلور پہنچنے کے تین دن کے اندر ہی بنگلور، بیلگام ، اُڈپی اور دکشن کنڑا سے تعلق رکھنے والے قریب سو مسافروں کا مینگلور میں ہی کورونا ٹیسٹ لیا گیا اور رپورٹ نیگیٹیو آتے ہی سات دن کورنٹائن مکمل کراکے اُن لوگوں کو اُن کے اُن کے گھر بھیج دیا گیا، مگر صرف اُترکنڑا والوں کا کورونا ٹیسٹ نہیں لیا گیا اور بغیر ٹیسٹ لئے ہی سات دن بعد اُترکنڑا روانہ کردیا۔ اب یہ تمام 75 مسافر بھٹکل ہوٹل کولا پیراڈائز میں کورنٹائن میں ہیں۔
مسافروں کا سوال ہے کہ مینگلور میں صرف اُتر کنڑا کے لوگوں کے ساتھ امتیاز کیوں برتا گیا، وہاں ہم لوگوں کے تھوک کے سیمپل جانچ کے لئے کیوں نہیں لئے گئے اور ٹیسٹ کے بغیر ہی ہم تمام 75 مسافروں کو اُترکنڑا جانے کے لئے کیوں کہا گیا۔ اس تعلق سے ساحل آن لائن نے دکشن کنڑا کی ڈپٹی کمشنر محترمہ سندھو بی روپیش سے موبائل اور وہاٹس ایپ کے ذریعے رابطہ کرنے کی کوشش کی، مگر اُن سے رابطہ نہیں ہوسکا۔
بھٹکل پہنچے ہوئے مسافروں کا یہ بھی سوال ہے کہ مینگلور میں کورنٹائن کرنے کے بعد بنگلور، بیلگام، اُڈپی اور دیگر مختلف اضلاع کے تمام لوگوں کو سات دن کے کورنٹائن کے بعد گھر بھیجا گیا ہے مگر ضلع اُترکنڑا کے لوگوں کو مینگلور میں سات دنوں کا کورنٹائن مکمل کرنے کے بعد پھر سات دن کورنٹائن میں بھٹکل ہوٹل میں رہنا پڑ رہا ہے۔ ان لوگوں کا سوال ہے کہ ایک ہی ریاست میں دو الگ الگ قانون کیوں ہیں ؟
بھٹکل میں ریپییڈ ٹیسٹ: پتہ چلا ہے کہ شام کو دمام سے بھٹکل پہنچنے والے اُترکنڑا کے تمام 75 مسافروں کے ریپیڈ ٹیسٹ لئے گئے ہیں۔ خبر یہ بھی ہے کہ تمام کی رپورٹ نیگیٹو آچکی ہے، البتہ سرکاری سطح پر تصدیق ہونی باقی ہے۔
خیال رہے کہ بھٹکل مسلم جماعت منطقۃ الشرقیہ کی زیر اہتمام اس خصوصی چارٹرڈ فلائٹ کا انتظام کیا گیا تھا جس میں بھٹکل سمیت ضلع اُترکنڑا، دکشن کنڑا، اُڈپی اور ریاست کے دیگراضلاع کے جملہ 174 مسافر سوار تھے۔
