ریاض، 10؍اپریل (ایس او نیوز؍ایجنسی)  سعودی عرب نے اعلان کیا کہ اندرون یا بیرون ملک کے 10لاکھ افراد کو جاریہ سال حج کی اجازت دے گا جبکہ گذشتہ دوسالوں کے دوران صرف مقامی افراد کو ہی اس کی اجازت دی گئی تھی۔کورونا وائرس پر قابو پانے کے لیے گذشتہ دو برسوں میں حج کے موقع پر عازمین کی تعداد بہت کم تھی۔ہفتہ کو سعودی حکام نے کہا ہے کہ اس سال 65 سال سے کم عمر افراد حج کر سکیں گے۔ تمام عازمین کو مملکت روانگی سے 72 گھنٹے قبل کورونا کا نیگٹیو پی سی آر ٹسٹ پیش کرنا ہوگا۔

عازمین کے پاس سعودی وزارت صحت سے منظور شدہ ویکسین سرٹیفکیٹ ہونا چاہیے۔ وزارت نے کہا ہے کہ اس فیصلہ کے تحت عازمین کی بڑی تعداد کو حج کی اجازت دینے کی کوشش کی گئی ہے۔عازمین کی تعداد میں اضافہ ممالک کے لیے مختص کوٹے کے مطابق ہوگا جبکہ اس کے ساتھ کورونا سے بچاؤ کی تدابیر کو بھی مدنظر رکھا جائے گا۔سرکاری اعداد و شمار کے مطابق گزشتہ برس 58 ہزار 745 افراد نے فریضہ حج ادا کیا تھا۔کورونا کی وبا سے قبل اکثر حجاج کی تعداد 20 لاکھ سے تجاوز کر جاتی تھی۔

بیان میں کہا گیا کہ سعودی حکومت کے لیے بات انتہائی اہمیت کی حامل ہے کہ وہ حج زائرین کے ساتھ ساتھ مسجد نبویؐ کی زیارت کرنے والوں کی حفاظت اور سیکیورٹی کو یقینی بنائے۔ان کا کہنا تھا کہ ہمارا مقصد اس بات کو یقینی بنانا ہے کہ دنیا بھر سے زیادہ سے زیادہ مسلمان محفوظ اور روحانی ماحول میں حج اور مسجد نبویؐ کی زیارت کی سعادت حاصل کر سکیں۔انہوں نے کہا کہ دنیا بھر میں اس سال پر ملک لوگ مختص کردہ کوٹے کے مطابق ہی حج کر سکیں گے جس میں انہیں صحت کے حوالے سے طے کردہ اصول و ضوابط پر عمل کرنا ہو گا۔

سعودی عرب کی وزارت حج و عمرہ نے 65سال سے زائد عمر کے افراد کے حج کرنے پر پابندی لگا دی ہے جبکہ حج کرنے والوں کے لیے ویکسینیشن لازمی قرار دی گئی ہے۔سعودی سے باہر سے آنے والے افراد کو کووڈ۔19 پی سی آر ٹسٹ کی منفی رپورٹ جمع کرانی ہوگی اور یہ رپورٹ سعودی عرب روانگی سے 72 گھنٹے پرانی نہ ہو۔وزارت حج و عمرہ نے تمام زائرین سے درخواست کی ہے وہ ان ہدایات پر عملدرآمد یقینی بنائیں اور حج کی ادائیگی کے دوران صحت اور حفاظت کے لیے تمام احتیاطی تدابیر اختیار کریں۔