عمرہ زائرین کی تعداد پر کوئی پابندی نہیں:سعودی عرب
دبئی، 5؍اگست (ایس او نیوز؍ایجنسی) حج و عمرہ کے نائب وزیر ڈاکٹر عبدالفتاح نے اعلان کیاہے کہ اسلامی نئے سال کے دوران نئے عمرہ سیزن کیلئے حجاج کی تعداد کی کوئی حد نہیں ہے، بشرطیکہ یہ تعداد مجاز حکام کی مقرر کردہ ضروریات سے متصادم نہ ہو، اور احتیاطی تدابیر کی تعمیل ہو-ڈپٹی وزیر نے یہ اعلان قومی کمیٹی برائے حج، عمرہ اور ویزٹ ایکٹی وی ٹیز کے اجلاس کے دوران کیا-مشعل نے کہا کہ متعلقہ حکام کو ہدایت دی گئی ہے کہ وہ عمرہ کی خدمات فراہم کرنے والی لائسنس یافتہ کمپنیوں کو ضروری تعاون فراہم کریں اور ایسے ایجنٹوں کو خارج کریں جو ویزا قوانین کی خلاف ورزی کرتے پائے جاتے ہیں -
دوسری جانب سعودی عرب میں سیاحتی ویزے پر آنے والے افرادعمرہ بھی کرسکیں گے-سعودی اخبار کے مطابق سعودی حکام نے سیاحتی ویزے سے متعلق مزید تفصیلات جاری کی ہیں اور نئے سیاحتی ویزے کیلئے ای ویب سائٹ مخصوص کی ہے- ویزے کی تمام کارروائی آن لائن کی جائے گی-ای سیاحتی ویزہ ملٹی پل اور ایک برس کیلئے مؤثر ہوگاجس کے تحت ایک بار آنے پر سیاح90دن سعودی عرب میں گزار سکیں گے اورسیاحتی پروگراموں میں حصہ اور عمرہ بھی ادا کرسکیں گے تاہم سعودی عرب آنے والے سیاحوں کو کورونا ایس او پیز کی پابندی کرنا لازمی ہوگی-سعودی عرب نے سیاحتی ویزے کے اجرا کیلئے ویب سائٹ پر سیاحت اور عمرہ پروگراموں کی تفصیلات بھی جاری کی ہیں -