جدہ،24؍اکتوبر(ایس او نیوز؍ایجنسی) سعودی عرب حکومت کی طرف سے ویزا فیس میں چھ گنا اضافہ کر دیا گیا ہے جس کے بعد حج اور عمرہ دونوں ہی پہلے سے مہنگے ہو جائیں گے۔ میڈیا رپورٹوں کے مطابق سنگل انٹری ویزا کی فیس 93 ڈالر سے بڑھا کر 533 ڈالر جبکہ ملٹیپل (ایک سے زائد) انٹری والے 6 مہینے کے ویزا کی فیس 800 ڈالر اور ایک سال والے ویزا کی قیمت 1333 ڈالر کر دی گئی ہے۔

واضح رہے کہ ہندوستان میں حج کے لئے آن لائن درخواستیں پیش کرنے کا سلسلہ شروع ہو چکا ہے اور اسی درمیان سعودی عرب سے ویزا فیس میں اضافہ کی خبر حج بیت اللہ جانے کی خواہش رکھنے والے فرزندان توحید کے لئے ایک جھٹکے کی طرح ہے۔ اطلاعات کے مطابق ویزا فیس کا یہ اضافہ تمام عازمین یا کاروباری مسافرین پر نافذ ہوگا، تاہم پہلی مرتبہ سفر کرنے والوں کو اس سے مستثنیٰ رکھا گیا ہے۔

بتایا جارہا ہے کہ یہ اضافہ پلاننگ، معیشت اور سعودی وزارتوں کی سفارشات پر مبنی تھا، جوکہ 2 اکتوبر کو نافذ ہوئیں اور نئے اسلامی سال کے آغاز کے ساتھ ان کا اطلاق ہو گیا۔ نئے ضوابط کو تیل پر ریاست کا انحصار کم کرنے اور امیگریشن فیس سمیت دیگر شعبوں میں محصول کو بڑھانے کے لئے ایک وسیع مہم کے حصے کے طور پر دیکھا جا رہا ہے۔

ادھر، رواں سال حج کے لئے درخواستیں پیش کرنے کے لئے 10 نومبر تک کی مدت مقرر کی گئی ہے۔ اس مرتبہ عازمین حج کے لئے جی ایس ٹی کی رقم 18 فیصد سے کم کر کے 5 فیصد کر دی گئی ہے۔ خواتین کے لئے خوشی کی بات یہ ہے کہ وہ بغیر کسی محرم کے اپنے گروپ کے ساتھ حج کے لئے جا سکتی ہیں۔