مکہ مکرمہ، یکم دسمبر (ایس او نیوز؍ایجنسی)سعودی وزارت حج و عمرہ نے مملکت میں عمرہ زائرین کی آمد کے حوالے سے شرائط وضوابط کا اعلان کردیا ہے-

وزارت کے مطابق حکومت کی جانب سے منظور شدہ ویکسین لگوانے والے غیر ملکی زائرین کو سعودی عرب میں آمد کے ساتھ ہی بغیر کسی قرنطینہ کے عمرہ ادا کرنے کی اجازت ہوگی-

مگر ایسے افراد جنھوں نے عالمی ادارہ صحت کی طرف سے منظور شدہ ویکسین لگوائی ہوئی ہے،مگر وہ سعودی عرب میں منظورشدہ نہیں، انھیں عمرہ کے مناسک ادا کرنے سے قبل تین دن تک قرنطینہ میں رہنا پڑے گا-

سعودی عرب کی سرکاری خبر رساں ایجنسی ایس پی اے کے مطابق48گھنٹے بعد ان افراد کوکرونا وائرس کے منفی ٹیسٹ کی صورت میں عمرہ کی اجازت دی جائے گی-

وزارت نے بتایا کہ تمام زائرین کے لیے لازم ہے کہ وہ اپنے ممالک سے کورونا وائرس کی ویکسین کی ضروری خوراک مکمل کر کے تشریف لائیں -

حال ہی میں سعودی عرب کی وزارت حج عمرہ نے سعودی اتھارٹی فار ڈیٹا اینڈ آرٹیفیشل انٹیلی جنس”سدایہ“کے تعاون سے ایک نئی سروس متعارف کرائی ہے جس میں مملکت سے باہر سے آنے والے زائرین کو مسجد حرام اور مسجد نبوی میں عمرہ اور نماز ادا کرنے کے لیے ایپس کے ذریعے اجازت نامہ جاری کرنے کا فیصلہ کیا گیا ہے-

ایک بیان میں وزارت حج نے کہا کہ یہ سروس”قدوم“پلیٹ فارم پر رجسٹر ہونے اور مملکت میں پہنچنے کے بعد”اعتمرنا اور توکلنا“کی ایپس پرموثرہو گی- ان دونوں ایپس میں سے کسی ایک پرعمرہ کی اجازت نامہ کی تصدیق کی جا سکے گی-

سعودی عرب میں حج و عمرہ کی وزارت نے قبل ازیں اس بات پر زور دیا تھا کہ مسجد الحرام میں عمرہ اور نماز ادا کرنے اور مسجد مصطفی صلی اللہ علیہ وسلم کی زیارت کے لیے اجازت نامے کا اجرا ان لوگوں تک محدود رکھا جائے جنہیں کرونا وائرس ویکسین کی دو خوراکیں دی گئی ہوں - سعودی عرب میں ویکسین کی منظوری دی گئی ہے-