سعودی عرب سے آنے والے مسافروں پر آب زم زم لانے پر پابندی
ریاض ، یکم جنوری (ایس او نیوز؍ایجنسی) سعودی عرب سےہندوستان آنے والے مسافروں پر آب زم زم لانے پر پابندی عائد کردی گئی ہے البتہ عمرہ اور حج ویزہ کے حامل مسافروں کو آب زم زم لانے کی اجازت ہوگی۔
ذرائع سے ملی اطلاع کے مطابق جدہ ایئرپورٹ حکام نے تمام پرائیوٹ ایئر لائنز کو مراسلہ جاری کیا ہے جس کے مطابق عمرہ اور حج ویزہ کے حامل مسافروں کو ہی آب زم زم کی اجازت ہوگی، زائرین کو 5 لیٹر کی ایک ہی بوتل لانے کی اجازت ہوگی۔
مراسلے میں کہا گیا کہ وزٹ ویزہ، بزنس ویزہ اور سیاحتی ویزہ رکھنے والوں کو آب زم زم کی اجازت نہیں ہوگی۔
سعودی حکام کی جانب سے ہدایات دی گئی ہیں کہ تمام ایئر لائنز انتظامیہ مسافروں کے سامان کی چیکنگ کو یقینی بنائیں اور مسافروں کی مکمل اسکریننگ کی جائے۔